بالالارعا ساپالى ءارى قاۋىپسىز جاڭا جىلدىق سىيلىقتاردى قالاي تاڭداۋ كەرەك

جاڭا جىل مەرەكەسى قارساڭىندا اتا-انالار بالالارى ءۇشىن جاڭا جىلدىق سىيلىقتاردى كوپتەپ الادى. الايدا بالالارعا ساپالى ءارى قاۋىپسىز سىيلىق ساتىپ الۋ ءۇشىن ءبىرقاتار ەرەجەنى بىلگەن ءجون. بۇل تۋرالى الماتى قالالىق سانيتاريالىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى گاۋحار كاتكەنوۆا ايتتى، دەپ حابارلايدى Kazinform.

دارىگەردىڭ سوزىنشە، جاڭا جىلدىق سىيلىقتاردى ۇيىمداستىرىلعان ساۋدا ورىندارىنان، ياعني، دۇكەن، سۋپەرماركەت، بولشەك جانە كوتەرمە ساۋدا بازارلارىنان ساتىپ الۋ كەرەك. سىيلىقتى ساتىپ الاردا ەڭ الدىمەن قاپتامانىڭ ءتۇپنۇسقالىعى مەن اسەمدىگىنە ەمەس، ونىڭ مازمۇنىنا نازار اۋدارۋ كەرەك.

«تاتتىلەردىڭ قۇرامىندا ءدام مەن حوش ءيىستى كۇشەيتكىشتەر، كونسەرۆانتتار (E200 ،E202 ،E210 ،E249)، سينتەتيكالىق بوياعىشتار، تابيعي سەكىلدى حوش يىستەندىرگىشتەر، گيدرلەنگەن مايلار مەن توڭ مايلار، سونداي-اق تابيعي كوفە بولماۋى كەرەك. تابيعي بوياعىشتار مەن حوش يىستەندىرگىشتەرگە رۇقسات ەتىلەدى. سونىمەن قاتار بالالار اراسىندا ىشەك اۋرۋىنا اكەلۋى مۇمكىن كرەمدى كونديتەرلىك ونىمدەر سەكىلدى تەز بۇزىلاتىن ونىمدەردى الماعان ءجون»، - دەدى گاۋحار كاتكەنوۆا.

سپيكەر اتاپ وتكەندەي، ءاربىر سىيلىقتا ءونىم تۋرالى قازاق جانە ورىس تىلدەرىندە جازىلعان اقپارات پەن انىق وقىلاتىن بەلگى (زاتبەلگى) بولۋى كەرەك.

تاماق ونىمدەرىندە مىندەتتى تۇردە مىنا مالىمەتتەر بولۋى ءتيىس:

ءونىمنىڭ اتاۋى؛

دايىنداۋشىنىڭ ءوز اۋماعىندا تۇتىنۋشىلاردان شاعىم قابىلداۋعا ۋاكىلەتتى دايىنداۋشىنىڭ اتاۋى جانە ورنالاسقان جەرى (بار بولسا)؛

نەتتو سالماعى؛

دايىنداۋشىنىڭ تاۋار بەلگىسى (بار بولسا)؛

ءونىمنىڭ قۇرامى؛

تاعامدىق قۇندىلىعى؛

ساقتاۋ شارتتارى؛

جارامدىلىق مەرزىمى نەمەسە ساقتاۋ مەرزىمى (كارامەل مەن دراجە ءۇشىن)؛

ءونىم جاسالعان جانە سايكەستەندىرىلۋى مۇمكىن قۇجاتتىڭ بەلگىلەنۋى؛

سايكەستىكتى راستاۋ تۋرالى اقپارات بولۋ كەرەك.

سونىمەن بىرگە، ءتاتتى جاڭا جىلدىق سىيلىقتى تاڭداعان كەزدە قاپتامانىڭ بەرىكتىگىنە نازار اۋدارۋ كەرەك. بۇل رەتتە كامپيتتەر مەن باسقا دا تاتتىلەر سىرتقى اسەردەن جاقسى قورعالۋى كەرەك، قاپتاما مىقتاپ جابىلۋى كەرەك، مىجىلعان نەمەسە دەفورماتسيالانباعان بولۋى ءتيىس. كونديتەرلىك ونىمدەردى توڭازىتقىشتا نەمەسە قاپتامادا كورسەتىلگەن تەمپەراتۋرالىق رەجيمى بار بولمەدە ساقتاۋ كەرەك.

«ەگەر جۇمساق ويىنشىق العىڭىز كەلسە، وندا قاتتى نەمەسە وتكىر زاتتار بولماۋى كەرەك. جۇمساق ويىنشىقتىڭ تىگىستەرى بەرىك بولۋى كەرەك. سونىمەن قاتار تاڭبالاۋ تۇتىنۋشى قاپتاماسىنا نەمەسە ويىنشىقپەن بىرگە جۇرەتىن توسەمگە جازىلۋى كەرەك. تاڭبالاۋ انىق، جاقسى كورىنەتىن، وشىرىلمەيتىن بولۋى ءتيىس جانە وندا ويىنشىقتىڭ اتاۋى مەن جاس ەرەكشەلىگى، دايىنداۋشى كاسىپورىننىڭ اتاۋى، مەكەنجايى، جاسالعان كۇنى، قاۋىپسىز پايدالانۋ جونىندەگى ەسكەرتۋ جازبالارى بولۋى ءتيىس»، - دەدى سپيكەر.

ءۇش جاسقا دەيىنگى بالالارعا ارنالعان ويىنشىقتاردى دايىنداۋ كەزىندە وعان شىنى مەن تۇكتى ماتەريالداردى ارالاستىرۋعا جانە قۇرامىندا تەز تۇتاناتىن ماتەريالداردى، قاتتى نەمەسە وتكىر بوگدە زاتتارى بار (شەگەلەر، ينەلەر، مەتالل جوڭقالار، شىنى سىنىقتارى جانە ت. ب. ) تولتىرعىش ماتەريالداردى قولدانۋعا جول بەرىلمەيدى. ويىنشىقتاردىڭ ءپىشىنى دۇرىس، بەتى تەگىس بولۋى كەرەك.

«جاڭا جىلدىق سىيلىق بالاڭىزدىڭ دەنساۋلىعىنا زيانىن تيگىزبەۋى ءۇشىن ويىنشىقتاردىڭ ساپاسى مەن قاۋىپسىزدىگى تۋرالى ستاندارتتاردىڭ تالاپتارىنا نازار اۋدارعان ءجون. سوندىقتان ءسىز ساتۋشىدان سىيلىقتىڭ ساپاسى مەن قاۋىپسىزدىگىن راستايتىن قۇجاتتاردى، اتاپ ايتقاندا، سايكەستىك دەكلاراتسيالارى مەن كولىك جۇك قۇجاتتارىن سۇراۋعا قۇقىلىسىز»، - دەپ اتاپ ءوتتى گاۋحار كاتكەنوۆا.