بالالارعا الەۋمەتتىك جەلىدە وتىرۋعا تىيىم سالىنۋى مۇمكىن
ۇلى بريتانيا ۇكىمەتى 16 جاسقا تولماعان بالالارعا الەۋمەتتىك جەلىلەردە وتىرۋعا تىيىم سالۋى مۇمكىن. بيلىكتەگىلەر جاس جەتكىنشەكتەردى عالامتورداعى زياندى كونتەنتتەن قورعاعىسى كەلەدى، دەپ حابارلايدى Kazinform ءتىلشىسى.
ۇكىمەت بۇعان دەيىن ينتەرنەتتەگى قاۋىپسىزدىك تۋرالى زاڭ قابىلداپ، ونى بۇزعان كومپانيالارعا ءىرى كولەمدە ايىپپۇل سالۋدى ۇيعاردى. بالالارعا زياندى كونتەنت كورسەتكەنى ءۇشىن پلاتفورمالار جاھاندىق كىرىسىنىڭ 10 پايىزىن تولەۋگە مىندەتتەلەدى. ءبىراق بۇل ازدىق ەتەدى دەپ شەشكەن بيلىكتەگىلەر ەندى 16 جاسقا تولماعاندارعا الەۋمەتتىك جەلىلەردى پايدالانۋعا شەكتەۋ قويماق.
«قازىر وسى ماسەلە بويىنشا اقىلداسىپ جاتىرمىز. بولاشاقتا بالالار الەۋمەتتىك جەلىلەردى پايدالانباس بۇرىن اتا- اناسىنىڭ رۇقساتى سۇرالاتىن بولادى»، - دەيدى ۇلى بريتانيانىڭ عىلىم ءمينيسترى ەندريۋ گريففيت.
ينستاگرام مەن پينتەرەست جەلىلەرىنەن زياندى كونتەنت كورىپ، ءوز- وزىنە قول سالعان 14 جاسار موللي راسسەلدىڭ وتباسى قايىرىمدىلىق قورىن اشقان بولاتىن. قور قىزمەتكەرلەرىنىڭ پىكىرىنشە، تەلە-راديو ەفيرى مەن ينتەرنەتتەگى اقپاراتتى قاداعالاۋمەن اينالىساتىن وفكوم اگەنتتىگىنە قوسىمشا وكىلەتتىكتەر بەرۋ كەرەك.
«الەۋمەتتىك جەلىلەر تاۋەلدىلىك تۋعىزىپ، شىندىققا جاناسپايتىن الەمگە جەتەلەيدى. ول جاسوسپىرىمدەرگە ارنالعان ورىن ەمەس. سوندىقتان رەتتەۋشى ورگاننىڭ قىزمەتىن كۇشەيتۋ كەرەك»، - دەيدى قوعام بەلسەندىسى بيبون كيدرون.
قايىرىمدىلىق ۇيىمدارى مەن بەلسەندىلەر 2017 -جىلدان بەرى عالامتورداعى قاۋىپتى كونتەنتپەن قاتاڭ كۇرەس جۇرگىزۋگە شاقىرىپ كەلەدى. ارنايى زاڭ كۇزدە قابىلدانباس بۇرىن وتە ۇزاق تەكسەرۋدەن وتكەن بولاتىن. بالالاردى قورعاۋعا ارنالعان قايىرىمدىلىق ۇيىمىنىڭ پىكىرىنشە، سوڭعى التى جىل ىشىندە عالامتوردا بالالار ومىرىنە قاۋىپ توندىرگەن 35 مىڭعا جۋىق قىلمىس تىركەلگەن.
