بالالار ءۇيىنىڭ تۇلەكتەرى ۇلكەن ومىردە قانداي كەدەرگىلەرگە تاپ بولادى

жетімдер
فوتو: ۆيدەودان كادر

استانا. KAZINFORM - ەلوردادا بالالار ءۇيى تۇلەكتەرى تۋرالى «مەملەكەتتىڭ بالالارى» دەرەكتى فيلمىنىڭ تانىستىرىلىمى ءوتتى. فيلمدى مادەنيەت جانە اقپارات مينيسترلىگىنىڭ قولداۋىمەن قازاقستاندىق قوعامدىق دامۋ ينستيتۋتى ازىرلەگەن.

دەرەكتى فيلم قازاقستاندىق قوعامدىق دامۋ ينستيتۋتىنىڭ «بالالار ءۇيى تاربيەلەنۋشىلەرىنىڭ قوعامعا الەۋمەتتىك ينتەگراتسياسى جانە بەيىمدەلۋى» اتتى 2022 -جىلعى زەرتتەۋى نەگىزىندە تۇسىرىلگەن.

بۇل باياندامادا ينتەرنات مەكەمەلەردەگى بالالاردىڭ پسيحوەموتسيونالدى دامۋ ەرەكشەلىكتەرى، ولاردىڭ قۇقىقتىق مارتەبەسى، ءبىلىم الۋ، جۇمىسقا تۇرۋ جانە تۇرعىن ۇيمەن قامتاماسىز ەتىلۋى ماسەلەلەرى زەرتتەلگەن.

«بۇل فيلم ينستيتۋتىمىزدىڭ زەرتتەۋى نەگىزىندە ءتۇسىرىلدى. ادەتتە عىلىمي ۇيىمداردىڭ زەرتتەۋلەرى كوپشىلىككە جەتە بەرمەيدى. ايتپەسە پايدالى زەرتتەۋلەر ەلىمىزدە كوپتەپ جاسالادى. وتكەن جىلى مادەنيەت جانە اقپارات ءمينيسترىنىڭ باستاماسىمەن «وتباسىلىق، گەندەرلىك جانە دەموگرافيالىق ساياسات سالاسىنداعى عىلىمي- زەرتتەۋ ۇيىمدارى كونسورتسيۋمى» قۇرىلدى. كونسورتسيۋم ماقساتى - اتالعان باعىتتار بويىنشا زەرتتەۋلەردى جۇيەلەۋ جانە ناسيحاتتاۋ. فيلم وسى كونسورتسيۋم اياسىندا جارىق كورىپ وتىر»، - دەدى قازاقستاندىق قوعامدىق دامۋ ينستيتۋتىنىڭ باسقارما ءتوراعاسى نۇربەك ماتجاني.

ايتا كەتەيىك، فيلم 4 كەيىپكەردىڭ وقيعاسى نەگىزىندە بالالار ءۇيى تۇلەكتەرىنىڭ ءبىرقاتار ماسەلەسىن قوزعايدى. ولاردىڭ ءومىرى ينتەرناتتان تۇلەپ شىققان سوڭ قالاي ءوربيتىنى، قوعامعا بەيىمدەلۋى كەزىندە قانداي قيىندىقتارعا تاپ بولاتىنى جانە قالىپتاسقان ستەرەوتيپتەر سالدارىنان قانداي كەدەرگىلەرگە ۇشىرايتىنى باياندالعان.

«جىل سايىن مىڭعا جۋىق جەتىم بالا ينتەرنات مەكەمەلەردەن تۇلەپ شىعىپ، ۇلكەن ومىرگە اياق باسادى. ومىردەن لايىقتى ورنىن تابۋ بارىسىندا ولاردىڭ كەيبىرەۋلەرى قالىپتاسقان ستەرەوتيپتەر كەسىرىنەن جۇمىسقا تۇرا الماسا، ەكىنشىلەرى قۇقىعىن قورعاپ، وزىنە تيەسىلى كومەكتى الا المايدى، ەندى بىرەۋلەرى دارىگەرگە قالاي قارالۋ كەرەگىن دە بىلمەيدى. ءقازىر قازاقستاندا وسىنداي 22081 جەتىم بالا بار. ولاردىڭ %82 ى - الەۋمەتتىك جەتىمدەر، ياعني، اتا-اناسى ءتىرى بولسا دا، ءتۇرلى سەبەپپەن ولاردىڭ قامقورلىعىنسىز قالعان بالالار. وكىنىشكە قاراي، بۇل فاكت ەلدەگى جەتىمدەردىڭ ماسەلەلەرىن شەشۋ قاجەتتىگىن عانا ەمەس، باستاپقى سەبەبى - وتباسى ينستيتۋتى پروبلەماسىنا نازار اۋدارۋ كەرەگىن مەڭزەيدى»، - دەپ جازىلعان فيلمنىڭ سيپاتتاماسىندا.

دەرەكتى فيلمدى بۇگىننەن باستاپ قازاقستاندىق قوعامدىق دامۋ ينستيتۋتىنىڭ YouTube ارناسىنان كورۋگە بولادى.

اۆتور
ايجان سەرىكجان قىزى

سوڭعى جاڭالىقتار