بالا قۇقىعىنا قاتىستى زاڭ نورمالارىنىڭ ىسكە اسۋى باقىلاۋدا - ەرلان قارين
استانا. KAZINFORM - مەملەكەتتىك كەڭەسشى ەرلان قارين ق ر بالا قۇقىقتارى جونىندەگى ۋاكىل دينارا زاكيەۆامەن كەزدەستى. ول بۇل تۋرالى ءوزىنىڭ الەۋمەتتىك جەلىدەگى پاراقشاسىنا جازدى.
«بۇگىن ق ر بالا قۇقىقتارى جونىندەگى ۋاكىل دينارا زاكيەۆامەن @zakiyevadinara كەزدەستىك. دينارا بولات قىزى مەملەكەت باسشىسىنىڭ ايەلدەر قۇقىعىن قامتاماسىز ەتۋ جانە بالالار قاۋىپسىزدىگى تۋرالى قابىلدانعان زاڭ نورمالارىنىڭ ىسكە اسۋىن باقىلاۋ مەن تالداۋ، سونىمەن بىرگە جەرگىلىكتى بالالار مەكەمەلەرىنىڭ جاعدايىن جاقسارتۋ بويىنشا تاپسىرمالاردى ورىنداۋ اياسىندا جاقىندا جەتىسۋ وبلىسىنا جۇمىس ساپارىمەن بارىپ قايتتى. دينارا بولات قىزى جەتىسۋ وبلىسىندا بۇل باعىتتا پسيحولوگيالىق قولداۋ ورتالىعى مەن 3 وتباسىن قولداۋ ورتالىقتارىنىڭ اشىلعاندىعى تۋرالى بايانداپ بەردى. سونىمەن بىرگە ۋاكىلەتتى ورگاندارمەن بىرلەسە وتىرىپ، وتباسىن قولداۋ ورتالىقتارى مەن موبيلدى توپتاردىڭ تاعى 6 اۋداندا اشۋ بويىنشا جۇمىس جۇرگىزىلىپ جاتقانىن ايتىپ ءوتتى»، - دەپ جازدى ەرلان قارين.
سونداي-اق كەزدەسۋ بارىسىندا ول بالالار ءۇيى، مەديتسينالىق-الەۋمەتتىك مەكەمەلەر، ينتەرناتتار، بالالار مەن جاس وسپىرىمدەر سپورت مەكتەپتەرى، ينكليۋزيا قولداۋ كابينەتتەرى، مادەنيەت ۇيلەرى مەن اۋىلدىق كلۋبتار، كەشكى مەكتەپ، ەمحانالار سياقتى بالالارعا ارنالعان مەكەمەلەردىڭ جۇمىسىمەن تانىسۋ كەزىندە انىقتالعان ماسەلەلەرگە توقتالىپ، ولاردى شەشۋگە قاتىستى شارالاردى پىسىقتاۋ بويىنشا بىرگە پىكىر الماسقانىن حابارلادى.
