بالا كۇيزەلىسكە تۇسپەس ءۇشىن اتا-انا نەگە ءمان بەرۋى كەرەك
وسكەمەن. KAZINFORM - پسيحولوگ زارينا قاھارمان قىزى بالا كۇيزەلىسكە تۇسپەس ءۇشىن اتا-اناسى نەگە ءمان بەرۋى كەرەكتىگىن ايتتى.
«بالاسىن نەشە ءتۇرلى ۇيىرمەلەرگە اپارىپ، بوس ۋاقىت قالدىرمايتىن اتا-انالار بولادى. بالا - بالا بولىپ ويناۋى كەرەك. ونىڭ ءار كۇنىن قاتاڭ جوسپارلاپ، قالىپقا سالىپ قويعاننان گورى ونىمەن ەموتسيالىق بايلانىس ورناتىپ، ءارتۇرلى جاعدايدا قانداي سەزىمدە ەكەنىن سۇراۋىڭىز قاجەت»، - دەيدى زارينا قاھارمان قىزى.
سەبەبى جان مەن سەزىم تىعىز بايلانىستى، سەزىمدەرىن اجىراتا العان بالا ەرەسەك ومىرىندە سونىڭ نەگىزىندە دۇرىس شەشىم قابىلداي الادى.
«مىسالى، «مىنا دوسىمنىڭ جانىندا مەن ءوزىمدى كەم سانايمىن، ول مەنى كوپ كەلەكە ەتەدى. ونىڭ قاسىندا كوڭىلسىز سەزىمگە بولەنەمىن. ال مىنا دوسىم مەن سياقتى ارماندايدى، الدىنا ماقسات قويادى. ونىڭ قاسىندا بويىمدى شابىت بيلەيدى. دەمەك، مەن ەكىنشى دوسىممەن جاقىنىراق ارالاسۋىم كەرەك» دەگەن سياقتى بويىن بيلەگەن سەزىمگە قاراي شەشىم قابىلدايدى. قازىرگى قوعامدا ءومىر ءسۇرىپ جاتقان بالالاردىڭ باسىم بولىگىندە ءبارى بار: ءۇي دە، كيىم دە، تاماق تا، اقشا دا، ءبىراق اتا-انالارى جۇمىسباستى، سول سەبەپتى ارالارىندا ەموتسيالىق بايلانىس جوق»، - دەيدى پسيحولوگ.
ونىڭ ايتۋىنشا، سوندىقتان بالا كۇيزەلىسكە ءتۇسىپ كەتەدى. ونىڭ الدىن الۋ ءۇشىن قانشا جۇمىسباستى بولساڭىز دا بالاعا كۇنىنە جارتى ساعات بولسىن ساپالى ۋاقىت ءبولىپ، اڭگىمەلەسىپ، سەزىمدەرىن سۇراپ وتىرۋ كەرەك.
اۆتور
تالعاتجان مۇحامەتبەك ۇلى
