بالا كۇنىمدە ويىنشىعىم بولعان جوق - قۋىرشاق تەاترىنىڭ ءارتيسى

Сәбила Абуева
فوتو: كەيىپكەردىڭ جەكە مۇراعاتىنان

الماتى. KAZINFORM - قازاق حالقىنىڭ مادەنيەتى مەن ونەرىنىڭ دامۋىنا ۇلەس قوسىپ جۇرگەن تالانتتى جاندار از ەمەس. سولاردىڭ ءبىرى ءارى بىرەگەيى مەملەكەتتىك قۋىرشاق تەاترىنىڭ اكتريساسى، قازاق س س ر-نىڭ ەڭبەك سىڭىرگەن ءارتيسى، «ساحناگەر» ۇلتتىق تەاتر سىيلىعىنىڭ يەگەرى، قازاقستاننىڭ ەڭبەك سىڭىرگەن ءارتيسى ءسابيلا ابۋيەۆا Kazinform تىلشىسىنە ونەرى مەن ءومىرى جايىندا سىر شەرتتى.

- ءسابيلا مەڭدىعالي قىزى، ونەردەگى ارىپتەستەرىڭىز ءسىزدى «قاراشاش» دەپ اتايدى. ول قايدان شىققان؟

- بىرەۋ بىلسە، بىرەۋ بىلمەس: مەن ەگىزدىڭ سىڭارىمىن. ءامينا اتتى سىڭارىم بار. اتا-انامىز ەرتەرەك دۇنيەدەن ءوتتى. اجەمىزدىڭ قولىندا وستىك. ءبىزدى سونداي جاقسى كوردى. مەنى قاراشاش ءامينانى التىنشاش دەيتىن. اجەم مەنىڭ ەكى اياقتى تاكسيىم بولاتىن، ارقاسىنا سالىپ جۇرەتىن. سوسىن جىل سايىن مەنىڭ شاشىمدى وزگەرتىپ وتىراتىن. كوز تيمەسىن دەپ بىرەسە تۇلىم قوياتىن، بىرەسە ايدار قوياتىن، بىرەسە كەكىل قويىپ، جان-جاعىن قايشىمەن قيىپ تاستايتىن. ءسويتىپ وسكەن بالامىن.

- بالالىق شاعىڭىزعا ساياحات جاسايىقشى. بالا كۇنىڭىزدە قانداي ويىنشىقتارىڭىز بولدى؟

- بالا كەزدە ەشقانداي ويىنشىعىم بولعان جوق. مەن قىز بالامىن با، ۇل بالامىن با تۇسىنبەدىم. نەگە دەسەڭىز، كەمپىردىڭ قولىندا وسكەننەن كەيىن قىستى كۇنى بىزگە كۋفايكا تىگىپ بەرەتىن. سوسىن ەندىگى جىلى كيەدى عوي دەپ ۇلكەن كيرزوۆىي ەتىك الاتىن. ءسويتىپ بالالىق شاعىم ءوتتى.

Сәбила Абуева
فوتو: كەيىپكەردىڭ جەكە مۇراعاتىنان

 

- قۋىرشاق تەاترىن تاڭداعان ادام قانداي بولۋى كەرەك؟

- ول ادامنىڭ ءوزى ءومىر باقي بالا بولۋى كەرەك. بالالىق قاسيەت - ول جۇرەگىندە، قارتايسا دا، سول جۇرەگىندە قالادى. سوندا عانا ول قۋىرشاق تەاترىندا ىستەي الادى.

- قۋىرشاق تەاترىنىڭ ءارتيسى بولۋدىڭ ەرەكشەلىگىن اتاپ وتسەڭىز؟

- قۋىرشاق تەاترىنىڭ ەرەكشەلىگى - جان-جاقتىلىق. ءبىزدىڭ ارتيستەردىڭ باسقا دراما نەمەسە مۋزىكالىق تەاترىنىڭ ارتيستەرىنەن باستى ەرەكشەلىگى ءبىر قويىلىمدا ءبىر ادام بىرنەشە رولدەردى سومداي بەرەدى. مىسالى، «اۋىل ءيتى اقباي» اتتى قويىلىمدا ءبىر ارتيست ءيتتىڭ ءرولىن سومداسا، ءدال سول قويىلىمدا مىسىقتىڭ ءرولىن دە وينايدى. سودان كەيىن، قۋىرشاق تەاترىندا ەر ادامنىڭ داۋىسى ايەل ادامنىڭ داۋىسى دەپ بولىنبەيدى. ەكەۋى دە قۋىرشاقتاردىڭ قاي ءتۇرى بولسىن بولمەي سومداي بەرەدى. مىنە، قۋىرشاق تەاترىنىڭ باستى ەرەكشەلىگى وسى.

Сәбила Абуева
فوتو: كەيىپكەردىڭ جەكە مۇراعاتىنان

- وسى كۇنگە دەيىن بالالىقتان اجىراماعان قانداي قاسيەتىڭىز بار؟

- ءبىزدىڭ تەاتردىڭ كورەرمەندەرى كىشكەنتاي بالالار. ولاردىڭ كۇلكىسى شىنايى، كوڭىلى تازا. جالپى، ساحنا ءارتىسى كورەرمەنەن شابىت الادى. ءبىز بالالارمەن بىرگە شاتتانامىز، ءسويتىپ جۇرگەندە ءوزىمىز بالا بولىپ كەتەمىز.

- ءبىر سۇحباتىڭىزدا ارنايى ءبىلىمىم جوق دەپسىز...

- راس. ارنايى ءبىلىمىم جوق. وقۋىم - تەاتر. مەن ءسابيرا اپايىم سياقتىمىن. مەنىڭ كىندىك قانىم تامعان جەرىم اتىراۋ وبلىسى ماحامبەت اۋدانى بۇرىنعى يامانكا دەيدى، سوندا وقىپ جۇرگەنىمدە «اق جايىق» دەگەن انسامبل بولدى، سول انسامبلدە مەن ونەر كورسەتتىم. ءبىر كۇنى بىزگە الماتىدان ءارتىس قىزدار كەلدى دە ماعان وسى الماتىعا كەلۋگە ۇسىنىس جاسادى. ءبىراق ول كەزدە مەن قۋىرشاق تەاترىنىڭ بار ەكەنىنەن حابارىم بولماپتى. سودان نە دە بولسا الماتىعا وقۋعا تۇسەمىن دەپ كەلدىم دە، مىنا پانفيلوۆشىلار پاركىنىڭ جانىندا ءجۇرىپ وسى تەاتردى كوردىم دە كىرىپ كەتتىم سودان بەرى مىنە تەاتر ساحناسىندا جۇرگەنىمە جارتى عاسىردان استام ۋاقىت ءوتىپتى. سوندىقتان ويلايمىن بۇل تەاتر مەنىڭ تاعدىرىم. قۇدايعا شۇكىر، قانشا ديرەكتورمەن جۇمىس ىستەدىم، ەشقايسىسىنا وكپەم جوق، بارىنەن دە ءتالىم- تاربيە الىپ، وسىنداي اتاققا جەتىپ وتىرمىن.

Сәбила Абуева
فوتو: كەيىپكەردىڭ جەكە مۇراعاتىنان

- وزىڭىزگە، قانداي وبراز جاقىن؟

- مەن 200- دەن استام ءرول سومدادىم. جالپى تەاتردا قانداي ءرول بەرىلەدى سونى سومدايسىڭ عوي، ال ەندى مەنىڭ كەيىپكەرلەرىم مىنەزدى وبرازدار - مىستان، ءىبىلىس، سايتان كەمپىر. جانۋارلاردان تۇلكى بار. ءبىراق وسىلاردىڭ ىشىندەگى مىستاننىڭ رولدەرىن ەرەكشە جاقسى كورەمىن. تەاترىمىزدا نۇرلان ءورازاليننىڭ «اق قۇس تۋرالى اڭىز» اتتى قويىلىمى ساحنالاندى، سونداعى مىستان مەنىڭ سۇيىكتى بەينەم.

- ءومىرىڭىزدى قانداي جانرعا جاتقىزار ەدىڭىز؟

- تراگيكومەديا. مەنى ءومىر ەركەلەتتى دەپ ايتا المايمىن. ءبىراق ۇلىم مەن قىزىم ءالى كۇنگە دەيىن ەركەلەتەدى.

- باقىت دەگەن ءسىز ءۇشىن نە؟

- باقىت دەگەن - بالا عوي، ءتاپ-ءتاتتى نەمەرەلەرىم.

- اڭگىمەڭىزگە، راحمەت!

Сәбила Абуева
فوتو: كەيىپكەردىڭ جەكە مۇراعاتىنان
Сәбила Абуева
فوتو: كەيىپكەردىڭ جەكە مۇراعاتىنان

 

اۆتور

الما مۇقانوۆا

سوڭعى جاڭالىقتار