بالا 18 جاسقا تولعاننان كەيىن شوتتاعى قاراجاتى قانشا جىل ساقتالادى

экономика
Фото: Фото: gov.kz

ۇلتتىق قوردىڭ ينۆەستيتسيالىق تابىسىنان اۋدارىلاتىن قاراجات بالا 18 جاسقا تولعاننان كەيىن 10 جىل شوتىندا ساقتالادى.

بۇل تۋرالى قارجى ۆيتسە-ءمينيسترى داۋرەن تەمىربەكوۆ ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا ايتتى، دەپ حابارلايدى Kazinform.

«2023-جىلعى 1- قازانداعى رەسمي دەرەكتەر بويىنشا ەلدەگى 18 جاسقا دەيىنگى بالالاردىڭ جالپى سانى شامامەن 7 ميلليون ادامدى قۇراپ وتىر. پارلامەنت قابىلداعان زاڭعا سايكەس ۇلتتىق قوردىڭ ينۆەستيتسيالىق تابىسىنىڭ 50 پايىزىن 18 جاسقا دەيىنگى بارلىق جاستاعى بالالار اراسىندا تەڭ ءبولۋ كوزدەلگەن. ۇلتتىق قور قاراجاتىن ءبىلىم الۋعا جانە تۇرعىن ءۇي جاعدايىن جاقسارتۋعا باعىتتالعان ناقتى ەكى ماقساتتا پايدالانۋ ۇسىنىلادى. ءبىلىم الۋ باعىتى بويىنشا قاراجاتتى جوعارعى وقۋ ورىندارىنىڭ اقىسىن تولەۋگە نەمەسە مەملەكەتتىك ءبىلىم بەرۋ جيناقتاۋ جۇيەسىنە اۋدارۋعا مۇمكىندىك بەرىلەدى. شەتەلدىك وقۋ ورنىندا وقۋ اقىسىن تولەۋگە قاراجاتتى پايدالانۋ شەكتەلمەيدى»، - دەدى ۆيتسە-مينيستر.

ونىڭ اتاپ وتۋىنشە، تۇرعىن ءۇي جاعدايىن جاقسارتۋ باعىتى بويىنشا قاراجاتتى تەك قازاقستان رەسپۋبليكاسى اۋماعىندا عانا پايدالانۋعا رۇقسات ەتىلەدى. سونىمەن قاتار، بۇل قاراجاتتى باستاپقى جارنا، يپوتەكالىق قارىزدار بويىنشا تولەم رەتىندە اۋدارۋعا مۇمكىندىك بەرىلەدى.

«قازاقستان رەسپۋبليكاسىنىڭ ازاماتتارى 18 جاسقا تولعانعا دەيىن - «قاتىسۋشىلار» بولىپ ەسەپتەلەدى، كامەلەتكە تولعاننان كەيىن - «الۋشىلار» ساناتىنا كوشەدى. 18 جاسقا تولعان كەزدە جيناقتالعان قاراجات بالانىڭ ايرىقشا مەنشىگى بولادى. ۋاكىلەتتى وپەراتورلارعا ءوتىنىش بەرگەننەن جانە شوت اشقاننان كەيىن جيناقتالعان قاراجات كورسەتىلگەن شوتقا اۋدارىلادى.

سونداي-اق، الۋشىلار رەتىندە زاڭدى وكىلدەر مەن مۇراگەرلەر دە بولا الادى. بالا 18 جاسقا تولعاننان كەيىن شوتتاعى قاراجات 10 جىل بويى ساقتالاتىن قۇقىق بەرىلەدى. شوتتاعى قاراجات 10 جىل ىشىندە تالاپ ەتىلمەگەن جاعدايدا، سول ادامنىڭ زەينەتاقى شوتىنا اۋدارۋ مۇمكىندىگى بار. قازاقستان رەسپۋبليكاسى ازاماتتىعىن جوعالتقان كەزدە تولەمدەرگە تالاپ قويۋ قۇقىعى دا جويىلادى»، - دەدى داۋرەن تەمىربەكوۆ.

سوڭعى جاڭالىقتار