باكۋدەن اقتاۋعا باعىت العان ۇشاقتان اقاۋ شىقتى

استانا. KAZINFORM - ازەربايجان استاناسى باكۋگە كەلگەن ۇشاقتان اقاۋ بارى انىقتالدى. اۋە بورتىندا جولاۋشىلار بولماعان. بۇل اقپاراتتى كولىك مينيسترلىگىنىڭ باسپا ءسوز قىزمەتى راستادى.

- اقتاۋ قالاسى اۋەجايىنىڭ اۋەايلاق جانە جەرۇستى قىزمەتتەرى اۋە كەمەسىن ۇشۋ-قونۋ جولاعىنان سۇيرەتۋ (سۇيەمەلدەپ شىعارۋ) جۇمىسىن اتقاردى. ۇشاقتىڭ قونۋى شتاتتىق رەجيمدە بولدى، قونعاننان كەيىن اۋە كەمەسىندە اقاۋ بارى انىقتالدى، - دەلىنگەن حابارلامادا.

ۇشاق باكۋدەن اقتاۋعا باعىت العان جانە بورتتا جولاۋشىلار بولماعان.

- قازىر اۋەجاي اشىق، شتاتتىق رەجيمدە جۇمىس ىستەيدى، — دەيدى ۆەدومستۆودان.

ەسكە سالايىق، 25-جەلتوقساندا اقتاۋ ماڭىندا Azerbaijan Airlines ۇشاعى اپاتقا ۇشىرادى.

ۇشاق بورتىندا 67 ادام، ونىڭ ىشىندە بەس ەكيپاج مۇشەسى بولعان. وقيعا سالدارىنان 38 جولاۋشى قازا تاپتى. وكىنىشكە قاراي، مەرت بولعان جانداردىڭ اراسىندا 6 قازاقستان ازاماتى بار.

اقتاۋ ماڭىندا بولعان ۇشاق اپاتىنا قاتىستى حالىقارالىق اۋە كولىگى اسسوتسياتسياسىنىڭ (IATA) باس ديرەكتورى ۆيللي ۋولش مالىمدەمە جاسادى. ول اۋە اپاتىنىڭ سەبەبىن انىقتاۋدىڭ مۇقيات، اشىق ءارى بەيتاراپ بولۋى كەرەكتىگىن ايتتى.