«بادىقوۆا STYLE» نەمەسە ەركەكتەر بۇزا الماعان رەكورد
«تاپتىم- اۋ سەنى» رومانتيكالىق كومەدياسى پروكاتقا شىققان ءۇش اپتا ىشىندە (1.12.2023-18.12.2023) بۇرىن سوڭدى قازاقستاننىڭ كينو وندىرىسىندە بولماعان بيىكتى باعىندىردى.
فيلمنىڭ جالپى تابىسى 1,5 ميلليارد تەڭگەدەن اسىپ، بۇعان دەيىن 1,3 ميلليارد تەڭگەمەن كوش باستاعان «بيزنەس پو- كازاحسكي» فرانشيزاسىن از ۋاقىتتا باسىپ وزدى. بۇل بۇرىن شىققان قازاق فيلمدەرى اراسىندا كاسسالىق تابىس بويىنشا، جاڭا ابسوليۋتتى رەكوردتى كورسەتكىش.
فيلمدەگى باستى رولدەردى ولجاس اباي مەن جۇرتشىلىققا ايسارا رولىمەن تانىلىپ، سوڭىنان پروديۋسەرلىكتىڭ تىزگىنىن ۇستاعان داريعا بادىقوۆا سومدادى.
«ءبىز قازىر كينوكەڭىستىكتە جاڭا جۇلدىزدىڭ پايدا بولعانىن كوردىك. جاڭا جۇلدىزدىڭ جانعانىنا كۋامىز. وسى جەتىستىگىمەن داريعا بادىقوۆانى قۇتتىقتايمىز. ول كينو ءوندىرىسى سالاسىندا ەر ازاماتتارمەن بىرگە ريەۆوليۋتسيا جاساي الاتىنىن دالەلدەدى. جالپى، قازاقتىڭ تۇپكى تاريحىنداعى، بۇگىن ءبىز ۇمىتقان ايەل ەركىندىگى، قانداي اۋىرلىقتى بولسىن ەركەكپەن تەڭ كوتەرىپ، قاجەت بولسا قولىنا قارۋ دا الاتىن مىقتىلىعى مىنە، دالەلدەنىپ جاتىر. داريعا تابىس تابۋ جاعىنان جاڭا رەكورد ورناتتى. ال ەندى، بۇل رەكوردتى بۇزۋعا كوپ جىلدار كەتەتىن سياقتى. دەگەنمەن ۋاقىت تورەشى. ءبىز، ءوز تاراپىمىزدان وسى فيلمدى قىسقى دەمالىسقا دەيىن كورسەتپەكشىمىز. سول ارقىلى داريعا حانىمعا، كاسسالىق تابىستى 2 ميلليارد تەڭگەگە دەيىن جەتكىزۋگە كومەكتەسەمىز دەپ جوسپارلاپ وتىرمىز»، - دەيدى Kinopark-Kinoplexx Theaters كومپانياسىنىڭ باسشىسى الماز مالدىبايەۆ.
سيۋجەت بويىنشا ساۋلە مەن جەكسەن ءبىر اۋىلدا تۇراتىن دوستار. جەكسەننىڭ اجەسى ۇيلەنبەي جۇرگەن نەمەرەسىنە قىز تاۋىپ بەر - دەپ ساۋلەگە بۇيىمتايىن ايتادى. ساۋلە كومەكتەسۋگە كەلىسەدى. ءبىراق جەكسەنگە: «قانداي جاعداي بولماسىن دوستىعىمىز بۇزىلماسىن» دەپ سەرتتەسەدى. جەكسەنگە ۇنايتىن قىز تابىلىپ، ءومىرى وزگەرە باستايدى. دۇرىس كيىنىپ، ءوز- وزىنە قاراپ، ءتىپتى ساۋلەمەن كەزدەسۋى سيرەي تۇسەدى. ونىڭ بۇلاي وزگەرگەنىنە اشۋلانعان ساۋلە دە تۇرمىسقا شىعامىن دەپ، يۋسۋفتىڭ ءىلتيپاتىن قابىلدايدى. ءبىر كۇنى جەكسەن مەن ساۋلە ۇرىسىپ قالىپ، جەكسەن اشۋمەن القا ەسىمدى قىزعا ۇيلەنۋگە شەشىم قابىلدايدى.. .
.. .ال، ءبىزدىڭ كورەرمەن بۇل رومانتيكالىق وقيعانىڭ قالاي اياقتالاتىنىن كينوتەاترلاردان كورە الادى. سەبەبى، رەكورد ورناتقان فيلم ءالى دە پروكاتتا.
