باعدات مۋسيننىڭ قىزمەتىنەن كەتۋى جەكە دەرەكتەردىڭ تارالۋ فاكتىسىنە قاتىستى ما - دەپۋتات پىكىرى
استانا. KAZINFORM - ءماجىلىستىڭ جالپى وتىرىسىنان كەيىن ب ا ق وكىلدەرى دەپۋتات ەكاتەرينا سمىشليايەۆادان قازاقستان رەسپۋبليكاسىنىڭ سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسيننىڭ قىزمەتىنەن كەتۋىنە قاتىستى ويىن سۇرادى.
ناقتى ايتقاندا، «باعدات مۋسيننىڭ قىزمەتىنەن كەتۋى قازاقستاندىقتاردىڭ جەكە دەرەكتەرىنىڭ تارالۋ فاكتىسىمەن بايلانىستى ما؟» دەگەن ساۋال قويىلدى.
«مينيستردىڭ قىزمەتىنەن كەتۋ سەبەبىن ويدان شىعارعىم كەلمەيدى، سوندىقتان ناقتى ءبىر پىكىر ايتا المايمىن. سونداي- اق، قازاقستاندىقتاردىڭ جەكە دەرەگىنىڭ تارالۋىن ساياسي تۇلعالاردىڭ كەلىپ، كەتۋىمەن بايلانىستى ەمەس دەپ ويلايمىن. سيفرلاندىرۋ سالاسىن ارتتىرعان جەردە تاۋەكەل قاتار جۇرەدى، ونىڭ ىشىندە جەكە دەرەكتەر دە بار»، - دەپ جاۋاپ بەردى ەكاتەرينا سمىشليايەۆا ءماجىلىس كۋلۋارىندا.
سونىمەن قاتار حالىق قالاۋلىسى باعدات مۋسيننىڭ ورنىنا كىم كەلۋى مۇمكىن دەگەن بولجامعا قاتىستى ويىن ايتتى.
«ەندى كىم مينيستر بولادى دەگەن سۇراققا قاتىستى الدىن الا بولجام جاساماي- اق قويايىق. كانديتات ۇسىنىلعان سوڭ تالقىلايتىن بولامىز، بىزدە ۋاقىت بار. ءبىزدىڭ كوميتەت ادەتتە كانديداتپەن ەگجەي- تەگجەيلى سۇحباتتاسادى. وعان ءتيىستى سۇراقتار قويىلادى، سالاعا قاتىستى ماسەلەلەرمەن جاقسى تانىسپىز جانە كانديداتتاردىڭ جاۋابىنا بايلانىستى بولادى دەپ ويلايمىن»، - دەيدى ول.
ايتا كەتەيىك، 30-ساۋىردە مەملەكەت باسشىسىنىڭ جارلىعىمەن باعدات مۋسين قازاقستان رەسپۋبليكاسىنىڭ سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى لاۋازىمىنان بوساتىلدى.
