باعدات مۋسين قازىر قايدا ءجۇر

استانا. KAZINFORM - بۇرىنعى سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين قىزمەتىنەن ءبىر اي بۇرىن بوساتىلعان ەدى.

«ا ق ش-تا جۇرگەنىمە بىرنەشە كۇن بولدى. بۇندا كەلۋىمە بىرنەشە سەبەپ بار. ارينە، كاسىبي ماسەلەلەردى وتباسىلىق ماسەلەلەرمەن بىرىكتىرۋگە تىرىسامىن)). بۇل جولى شاعىن توپ بوپ كەلدىك، سۇيىكتىم دينا، كەنجە قىزىم ءبىرعانىم جانە مەن. بىرىنشىدەن، كەز كەلگەن كاسىپتى مامان رەتىندە تەحنولوگيالىق دامۋدىڭ الدىڭعى قاتارىندا بولۋ ماعان دا قىزىق. سول سەبەپتى وسى كۇندەرى Bay Area-دا وتەتىن ءىس-شارالارعا قاتىسامىن»، - دەپ جازدى باعدات مۋسين Facebook پاراقشاسىندا.

سونداي-اق، ەكس-شەنەۋنىك كەنجە قىزىنىڭ روبوتوتەحنيكا جارىستارىنا قاتىساتىنىن ايتتى.

«ءداستۇر بويىنشا Digital Nomads-پەن (ءبىزدىڭ ايماقتىڭ Bay area-دا ورنالاسقان IT ماماندارىمەن) كەزدەسىپ، ءتۇرلى الەۋمەتتىك باستامالاردى تالقىلايمىز. كەزدەسۋ ءبىز قۇرعان Silkroad يننوۆاتسيالىق حابىنىڭ قابىرعاسىندا وتەدى. مەن ەلىمىزدىڭ سپورتتىق باعدارلامالاۋ فەدەراتسياسىنىڭ باسشىسى بولعاندىقتان، وسى جىلدىڭ قىركۇيەگىندە استانادا زياتكەرلىك سپورتىمىزدان (سپورتتىق باعدارلامالاۋ) الەم چەمپيوناتىنىڭ فينالىن وتكىزۋگە قاتىستى بىرنەشە ۇيىمداستىرۋشىلىق ماسەلەلەردى شەشۋگە بارامىن. ول ءۇشىن مەن ICPC باسشىسى بيلل پوۋچەرمەن جانە ونىڭ كومانداسىمەن كەزدەسەمىن»، - دەيدى ول.

ودان بولەك، ب. مۋسين ا ق ش-تىڭ بىرنەشە وقۋ ورنىن ارالاپ كورمەك.

«سونداي-اق باسقا ەلدەردە سيفرلاندىرۋدىڭ نەگىزىن قالىپتاستىرۋ ماسەلەسىن تالقىلاۋ ءۇشىن ءارتۇرلى ۋنيۆەرسيتەتتەردىڭ پروفەسسورلارىمەن كەزدەسۋلەر وتكىزۋدى جوسپارلاپ وتىرمىن. ويتكەنى قازاقستاننىڭ تاجىريبەسىن ودان ءارى تاراتۋ قاجەت. ا ق ش ۋنيۆەرسيتەتتەرى بۇعان قىزىعۋشىلىق تانىتادى دەپ ويلايمىن، سول سياقتى ءتۇرلى قورلارمەن، كومپانيالارمەن كەزدەسۋلەر وتەدى. جالپى بۇل ساپارعا جوسپار كوپ. بارلىعىن ورىنداۋعا مۇمكىندىگىنشە تىرىسامىن»، - دەيدى بۇرىنعى مينيستر.

ەسكە سالا كەتەيىك، ءبىر اي بۇرىن باعدات مۋسين مەملەكەت باسشىسىنىڭ جارلىعىمەن لاۋازىمىنان بوساتىلعان ەدى.

مينيستر بۇل قىزمەتتەن «ءوز ەركىممەن كەتتىم» دەپ جازسا دا، ءتۇرلى telegram ارنالار ونى «كەتىردى» دەپ داۋرىقتى.

وسى ورايدا ءبىزدىڭ اگەنتتىك ونىڭ مينيستر بولىپ جۇرگەن كەزدە ەلدى ەلەڭ ەتكىزگەن ارەكەتتەرى مەن باستامالارىنا شولۋ جاسادى.

ايتا كەتسەك، باعدات مۋسينگە قىلمىستىق ءىس قوزعالدى دەگەن قاۋەسەت تە ايتىلدى.

اۆتور
داۋلەت ىزتىلەۋ