باعدات مۋسينگە قاتىستى قىلمىستىق ءىس قوزعالدى ما - انتيكور جاۋابى
استانا. KAZINFORM - سىبايلاس جەمقورلىققا قارسى ءىس-قيمىل اگەنتتىگى بۇرىنعى سيفرلىق دامۋ، يننوۆاتسيالار جانە اەروعارىش ءمينيسترى باعدات مۋسيننىڭ ۇستىنەن قىلمىستىق ءىس قوزعالدى دەگەن اقپاراتقا قاتىستى جاۋاپ بەردى.
«قازىر سىبايلاس جەمقورلىققا قارسى ءىس-قيمىل اگەنتتىگى جانە ونىڭ اۋماقتىق قىلمىستىق ىستەر بولىمشەلەرىندە بۇرىنعى سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى ب. مۋسينگە قاتىستى قىلمىستىق ءىس وندىرىستە جوق»، - دەلىنگەن انتيكور تاراتقان حابارلامادا.
ەسكە سالا كەتەيىك، 30-ساۋىردە مەملەكەت باسشىسىنىڭ جارلىعىمەن باعدات مۋسين لاۋازىمىنان بوساتىلدى.
مينيستر بۇل قىزمەتتەن «ءوز ەركىممەن كەتتىم» دەپ جازسا دا، ءتۇرلى تەلەگرام ارنالار ونى «كەتىردى» دەپ داۋرىقتى. وسى ورايدا ءبىزدىڭ اگەنتتىك ونىڭ مينيستر بولىپ جۇرگەن كەزدە ەلدى ەلەڭ ەتكىزگەن ارەكەتتەرى مەن باستامالارىنا شولۋ جاساعان ەدى.
