باعدات مۋسين جاڭا قىزمەتى تۋرالى پىكىر ءبىلدىردى
استانا. KAZINFORM - باعدات مۋسين جاڭا قىزمەتى تۋرالى پىكىر ءبىلدىردى. بۇل تۋرالى ول Instagram الەۋمەتتىك جەلىسىندەگى پاراقشاسىنا جازدى.
«بۇگىن «قازاق تەلەكوم» ا ق باسقارماسىنىڭ ءتوراعاسى بولىپ تاعايىندالدىم. سەنىم ارتقاندارىڭىزعا العىس ايتامىن. كومپانيانىڭ ودان ءارى دامۋى ءۇشىن كوماندامەن جەمىستى ىنتىماقتاستىقتا جۇمىس ىستەپ، وركەندەۋى ءۇشىن كۇش-جىگەرىمىزدى سالامىز. «قازاق تەلەكوم» ا ق - نەگىزگى ۇلتتىق بايلانىس وپەراتورى رەتىندە ەلىمىزدىڭ تەحنولوگيالىق دامۋىن قامتاماسىز ەتۋدە ماڭىزدى ءرول اتقارادى. قوعام مەن مەملەكەت مۇددەسى ءۇشىن ءبىز ەلىمىزدەگى بايلانىس ينفراقۇرىلىمىن جەتىلدىرىپ، حالىقارالىق جوبالاردا ەل دامۋىنىڭ الەۋەتىن جۇزەگە اسىراتىن بولامىز»، - دەپ جازدى ول.
ەستەرىڭىزگە سالا كەتەيىك، بۇرىنعى قازاقستان رەسپۋبليكاسى سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين «سامۇرىق-قازىنا» ا ق ديرەكتورلار كەڭەسىنىڭ شەشىمىمەن «قازاق تەلەكوم» ا ق باسقارما ءتوراعاسى بولىپ تاعايىندالعانىن جازعان بولاتىنبىز.
اۆتور
باقىتگۇل اباي قىزى
