باعانىڭ باسسىز كەتكەنىنە Forbes تىزىمىندەگى وليگارحتار كىنالى - ءماجىلىس دەپۋتاتى
ساۋدا ورتالىقتارىنىڭ قوجايىندارى مەملەكەتتىڭ ىشىنەن قوعامنىڭ ەشبىر تالابىنا باعىنبايتىن مەملەكەت قۇرىپ العان. ءماجىلىس دەپۋتاتى باققوجا اناس ساۋدا ساياساتىن دامىتۋ ماسەلەلەرىنە ارنالعان ۇكىمەت ساعاتىندا وسىنداي پىكىر ءبىلدىردى، دەپ حابارلايدى Kazinform.
«بۇگىندە باعانىڭ كوتەرىلگەنىنەن ساۋدا ورتالىقتارى مەن ساۋدا ۇيلەرى، سولاردىڭ قوجايىندارى كىنالى دەپ اشىق ايتا الام. ساۋدا ورتالىقتارىنىڭ قوجايىندارىنىڭ ءبارى - Forbes تىزىمىندەگى وليگارحتار. ولار مەملەكەتتىڭ ىشىنەن قوعامنىڭ ەشبىر تالابىنا باعىنبايتىن مەملەكەت قۇرىپ العان.
2018 -جىلى ساۋدا ورتالىقتارىنداعى دۇڭگىرشەكتەردى جالعا بەرۋ قۇنى 1 شارشى مەترىنە 4 مىڭ تەڭگە بولسا، قازىر 21 مىڭ تەڭگە - 5 ەسە وسكەن. سالدارىنان كيىم-كەشەكتىڭ باعاسى جىل سايىن ءوسىپ جاتىر. مىسالى، 2018 -جىلى شۇلىقتىڭ باعاسى 300 تەڭگە بولسا، قازىر 1500 تەڭگە.
كوپ بۋتيكتەردە ەسەپتەۋىش قۇرال جوق. ساۋدا ورتالىقتارى سونى پايدالانىپ، كوممۋنالدىق تولەمدەرگە ويىنا كەلگەن باعانى قويادى. ارانى اشىلعانى سونشالىق، جالعا بەرۋ باعاسىن قىمباتتاتقانىمەن قوسا 2-3-اي الدىن الا دەپوزيت تالاپ ەتەدى. وسىلايشا ماڭدايى تەرلەمەستەن ميللياردتاپ پايدا تاۋىپ وتىرعان ساۋدا ورتالىقتارى مەملەكەتكە سالىق تولەمەۋدىڭ دە امالىن جاقسى ويلاستىرعان»، - دەدى ول.
باققوجا اناس ساۋدا ورتالىقتارىنىڭ كوبى جالعا بەرۋ اقىسىن قولما-قول اقشامەن الىپ وتىرعانى دا زاڭسىز ارەكەت ەكەنىن اتاپ ءوتتى.
«ساۋدا ورتالىقتارىنىڭ كوبى جالعا بەرۋ اقىسىن قولما-قول اقشامەن الىپ، بۋتيكتەردى وزدەرى اشقان جەكە كاسىپكەرلىك نىساندار ارقىلى سۋبارەنداعا بەرىپ، كىرىستەرىن جاسىرىپ وتىر. وسىنىڭ بارىنە نارازى بولعان ساۋداگەرلەردى ساۋدا ۇيىنەن شىعارىپ تاستايمىز دەپ قورقىتىپ وتىر. جۇمىسسىزدىق كەسىرىنەن امالسىز ساۋداعا كەتكەن حالىق وسىلايشا ساۋدا ورتالىقتارىنىڭ ايتقانىنا، لاڭىنا كونىپ وتىر. وسى ساۋدا ورتالىقتارىن قاشان رەتكە قوياسىزدار؟ ساۋدا نىساندارىندا ساۋداگەرلەرمەن بىرگە قوعامدىق باقىلاۋ ورناتىپ، سالىق ريەۆيزياسىن جاساۋعا دايىنسىزدار ما؟» - دەپ سۇرادى دەپۋتات.
ساۋدا جانە ينتەگراتسيا ءمينيسترى ارمان شاققاليەۆ بيىلدان باستاپ سالىق رەۆيزياسى باستالعانىن ەسكە سالدى. سونداي-اق، ساۋدا ورتالىعىنداعى نۇكتەنى سۋبارەنداعا بەرۋگە زاڭمەن تىيىم سالىنعانىن اتاپ ءوتتى. ۆەدومستۆو باسشىسى ساۋدا ورتالىقتارىنىڭ مونوپولياسىن كوپفورماتتى ساۋدا- ساتتىقتى دامىتۋ ارقىلى عانا شەكتەۋگە بولاتىنىن ايتادى.
