باناننىڭ قۇرامىندا التىن بار ەكەنى راس پا؟
استانا. KAZINFORM - باناننىڭ قۇرامىندا التىن بار دەگەن اقپارات الەۋمەتتىك جەلىدە ءجيى ايتىلادى. بۇل راس پا، الدە جاي ميف پە؟ عالىمداردىڭ ايتۋىنشا، بانان قۇرامىندا راسىمەن وتە از مولشەردە التىن كەزدەسەدى. ءبىراق ونىڭ كولەمى سونشالىق ماردىمسىز بولعاندىقتان، ونى ءوندىرىپ الۋ مۇمكىن ەمەس، دەپ حابارلايدى nature.com.
بانان قۇرامىنداعى التىن تۋرالى دەرەكتەر عىلىمي زەرتتەۋلەردە دە كەزدەسەدى. Nature جۋرنالىندا جاريالانعان مالىمەتكە سايكەس، وسىمدىك تىندەرىندەگى التىننىڭ تابيعي مولشەرى ادەتتە ءبىر گرام قۇرعاق ماسساعا شاققاندا 10 نانوگرامنان اسپايدى. بۇل - ميللياردتىڭ ون بولىگى عانا.
ورتاشا باناننىڭ جەۋگە جارامدى بولىگى شامامەن 120 گرام تارتادى. ونىڭ باسىم بولىگى سۋ بولعاندىقتان، قۇرعاق ماسساسى شامامەن 18 گرام عانا بولادى. وسىنداي كولەمدەگى باناندا بار بولعانى 180 نانوگرام التىن كەزدەسۋى مۇمكىن. بۇل - 0,00018 ميلليگرام عانا.
سالىستىرۋ ءۇشىن ايتساق، ءبىر گرام التىن الۋ ءۇشىن شامامەن 5,6 ميلليون باناندى وڭدەۋ قاجەت بولادى. بۇل - 670 تونناعا جۋىق جەمىس. مۇنداي كولەمدەگى باناننىڭ قۇنى التىننىڭ ءوز باعاسىنان بىرنەشە ەسە قىمباتقا تۇسەر ەدى.
عالىمداردىڭ تۇسىندىرۋىنشە، التىن جەر قىرتىسىندا وتە از مولشەردە بولادى. وسىمدىكتەر سۋ مەن مينەرالداردى تامىرى ارقىلى سىڭىرگەن كەزدە التىن بولشەكتەرى دە بىرگە ءوتۋى مۇمكىن. الايدا التىن وسىمدىك اعزاسىندا ەشقانداي بيولوگيالىق قىزمەت اتقارمايدى، تەك جينالىپ قالادى.
ماماندار باناننىڭ «التىن جينايتىن» وسىمدىككە جاتپايتىنىن ايتادى. كەيبىر ارنايى وسىمدىكتەر عانا بەلگىلى ءبىر حيميالىق وڭدەۋدەن كەيىن باعالى مەتالداردى كوبىرەك جيناي الادى. ءبىراق تابيعي جاعدايدا مۇنداي كونتسەنتراتسيا كەزدەسپەيدى.
سونداي-اق باناننان التىن ءوندىرۋدىڭ تەحنيكالىق جاعىنان دا ءتيىمسىز ەكەنى ايتىلدى. ويتكەنى مەتالل وسىمدىك ىشىندە ءبىر جەرگە شوعىرلانبايدى، بۇكىل جاسۋشالارعا تارالىپ كەتەدى. ونى ءبولىپ الۋ ءۇشىن كۇردەلى حيميالىق وڭدەۋ قاجەت.
ايتا كەتەيىك، تاعامعا قولدانىلاتىن التىن، ياعني E175 قوسپاسى وسىمدىكتەردەن الىنبايدى. ول ارنايى تازارتىلعان اسىل مەتال سانالادى.
قورىتىندىلاي ايتقاندا، بانان قۇرامىندا التىن بارى راس. ءبىراق ونىڭ مولشەرى از بولعانى سونشا، تەك دالدىگى اسا جوعارى زەرتحانالىق قۇرىلعىلار ارقىلى عانا انىقتالادى.
