مباپپەگە ءتىل تيگىزگەن جانكۇيەرگە تۇرمە جازاسى تاعايىندالدى
استانا. KAZINFORM - يسپانيادا مادريدتىك «رەال» مەن فرانسيا قۇراماسىنىڭ شابۋىلشىسى كيليان مباپپەنى ناسىلدىك تۇرعىدان قورلاعان جانكۇيەرگە قاتىستى سوت ۇكىمى شىقتى.
ول 11 ايعا باس بوستاندىعىنان ايىرىلىپ، ەكى جىل بويى فۋتبول ماتچتارىنا قاتىسۋ قۇقىعىنان شەكتەلدى.
ۇكىمدى استۋريا پروۆينتسيالىق سوتىنىڭ ەكىنشى پالاتاسى شىعاردى.
وقيعا 2025 -جىلدىڭ 24-تامىزىندا «رەال» مەن «وۆەدو» اراسىنداعى ماتچتا بولعان. قوناقتار بۇل كەزدەسۋدە 3:0 ەسەبىمەن جەڭىسكە جەتكەن.
سوت ايىپتالۋشىنى وشپەندىلىككە نەگىزدەلگەن قىلمىس جاساعانى ءۇشىن كىنالى دەپ تانىپ، 11 ايعا باس بوستاندىعىنان ايىرۋ جازاسىن تاعايىندادى. سونىمەن قاتار وعان بەلگىلى ءبىر مەملەكەتتىك لاۋازىمداردى اتقارۋعا تىيىم سالىنىپ، ايىپپۇل سالىندى.
الايدا سوتتالعان ازامات ەكى جىل بويى رەسمي فۋتبول ماتچتارىنا بارماۋ شارتىمەن تۇرمە جازاسىن وتەۋدەن ۋاقىتشا بوساتىلدى.
«بۇل ءىس بويىنشا جەكە ايىپتاۋشى تاراپ رەتىندە قاتىسقان «رەال» كلۋبى، باسقا دا وسىنداي ىستەردەگىدەي، فۋتبول مەن جالپى سپورتتاعى ناسىلشىلدىكتىڭ كەز كەلگەن كورىنىسىنە قارسى كۇرەسۋگە جانە ونى تۇبەگەيلى جويۋعا بەيىلدى ەكەنىن تاعى دا راستايدى»، - دەلىنگەن كلۋبتىڭ مالىمدەمەسىندە.