ب ق و: قاراتوبە، تەرەكتى اۋداندارىندا توتەنشە جاعداي جاريالاندى

ورال. KAZINFORM - باتىس قازاقستان وبلىسىنىڭ قاراتوبە جانە تەرەكتى اۋداندارىندا توتەنشە جاعداي جاريالاندى.

قاراتوبە اۋدانى اكىمدىگىنەن تۇسكەن مالىمەتكە قاراعاندا، اۋدان اكىمىنىڭ جەرگىلىكتى اۋقىمداعى تابيعي سيپاتتاعى توتەنشە جاعداي جاريالاۋ تۋرالى شەشىمى شىقتى.

وسىعان بايلانىستى اۋدان اۋماعىندا ءتيىستى ءىس- شارالار اتقارىلاتىن بولادى. بقو تج دەپارتامەنتىنىڭ مالىمەتى بويىنشا 27-ناۋرىز كۇنى قورجىن اۋىلىندا 80 ءۇي سۋ استىندا قالىپ، 281 ادام مەكتەپكە كوشىرىلگەن ەدى.

اۋىل تۇرعىندارىنىڭ سوزىنە قاراعاندا، قۇلاعان ۇيلەر بار، ۇساق مال شىعىنعا ۇشىراعان.
قازىرگى ۋاقىتتا وقيعانىڭ جاي-جاپسارى انىقتالۋ ۇستىندە.

فوتو: ب ق و ت ج د

سونىمەن قاتار تەرەكتى اۋدانىنىڭ اكىمى ءاليا مۇحانبەتجانوۆا اۋدان اۋماعىندا توتەنشە جاعداي جاريالاۋ تۋرالى شەشىمنىڭ پورتالعا شىققانىن جەتكىزدى.

ونىڭ ايتۋىنشا، ءوزى باسى-قاسىندا بولعان اڭقاتى اۋىلىندا 20 ءۇي سۋعا كەتكەن. ورال قالاسىنا ىرگەلەس ورنالاسقان پودستەپنىي اۋىلىندا سونىمەن شامالاس. تەرەكتى، ۇزىنكولدە دە سۋعا كەتكەن ۇيلەر بار. ولاردىڭ سانى ناقتىلانۋ ۇستىندە.

ب ق و ت ج دەپارتامەنتىنىڭ باسپا ءسوز قىزمەتىنەن ءمالىم ەتكەنىندەي، وبلىستا وسى كەزگە دەيىن 273264 تەكشە مەتر قار سۋى سورىلىپ، 15937 قاپشىق توسەلگەن. سۋ تاسقىنىنىڭ الدىن الۋ شارالارىنا 696 ادام، 137 تەحنيكا، 138 موتومپومپا تارتىلعان.

ەسكە سالا كەتەيىك، بۇدان بۇرىن باتىس قازاقستان وبلىسى قورجىن اۋىلىندا ۇيلەر سۋ استىندا قالعانىن جازعان بولاتىنبىز.

سونداي-اق ورال قالاسىندا توتەنشە جاعداي جاريالاندى.

باتىس قازاقستان وبلىسىندا 350 گە جۋىق ادام ەۆاكۋاتسيالاندى.

اۆتور
عايساعالي سەيتاق