ب ق و-نىڭ تاعى ءبىر اۋدانىندا ۇيلەر سۋ استىندا قالدى
استانا. KAZINFORM - باتىس قازاقستان وبلىسىندا سىرىم اۋدانىندا ۇيلەر سۋ استىندا قالدى. ب ق و اكىمدىگىنىڭ باسپا ءسوز قىزمەتىنەن ءمالىم ەتكەنىندەي، وبلىس اكىمى ناريمان تورەعاليەۆ كەشە كەشكىسىن سۋ تاسقىنى بولعان سىرىم اۋدانىنا جول تارتتى.
ساعات 22.30 دا ءوڭىر باسشىسى اۋدان ورتالىعى جىمپيتى اۋىلىندا بولىپ، ۇيلەرى سۋ استىندا قالعان تۇرعىنداردى قاۋىپسىز ورىندارعا ەۆاكۋاتسيالاۋ جۇمىستارىنا جەتەكشىلىك ەتتى.
ساعات 22.30 بەن 02.00 ارالىعىندا سىرىم اۋدانىنا قاراستى 3 اۋىلدىڭ حالقى تۇگەلدەي جاقىن ماڭداعى قاۋىپسىز ەلدى مەكەندەرگە، تۋعان-تۋىستارىنىڭ ۇيلەرىنە كوشىرىلدى. قۇتقارۋشىلار كۇنى-ءتۇنى جۇمىس ىستەدى.
ساعات تۇنگى 00.00 دە وبلىس اكىمى ارنايى جىلجىمالى موبيلدى كولىكتە جەدەل شتابتىڭ وتىرىسىن وتكىزىپ، توتەنشە جاعدايلار دەپارتامەنتىنىڭ باسشىسىنان وبلىس بويىنشا جاعدايدى سۇراستىردى.
ءوڭىر باسشىسى ءتۇنى بويى توتەنشە جاعدايلار مينيسترىمەن بايلانىستا بولىپ، باسقا وبلىستاردان قوسىمشا تەحنيكالار مەن كۇشتەردىڭ باتىس قازاقستانداعى سۋ تاسقىنىنىڭ الدىن الۋعا باعىتتالۋىن قامتاماسىز ەتتى.
جەرگىلىكتى ساعات تاڭعى 05.00 گە دەيىن بارلىق جۇمىستىڭ جۇرگىزىلۋىن تولىقتاي قاداعالادى.
«اپات ايتىپ كەلمەيدى. تاسقىن سۋ تۇرعىنداردىڭ ءۇيىن تۇگەلىمەن جايلاعان. اپاتتىڭ سالدارىنان ەلەكتر جەلىلەرى، ۇيالى بايلانىس، ينتەرنەت مۇلدەم جۇمىس ىستەمەي قالعان. وسىناۋ قيىن كەزدە تۇرعىنداردىڭ ءبىر-بىرىنە دەگەن قامقورلىعى قۋانتتى. كورشى اۋىلدارداعى سىرىم اۋدانى تۇرعىندارى قۇتقارۋشىلارمەن قاتار ازاماتتاردى كوشىرۋگە قولۇشىن سوزىپ جاتتى. بۇل بىرلىگىمىزدىڭ بەكەم ەكەنىن كورسەتەدى. ناريمان تورەعاليەۆ اۋدان ورتالىعىنداعى سۋ دەڭگەيىنىڭ تۇسكەنىنە كوز جەتكىزگەن سوڭ، قاراتوبە اۋدانىنداعى اپاتتىق جاعدايدى باقىلاۋعا جول تارتتى»، - دەپ حابارلادى اكىمدىكتىڭ باسپا ءسوز قىزمەتى.
ەسكە سالا كەتەيىك، بۇدان بۇرىن ورال قالاسىندا توتەنشە جاعداي جاريالانعانىن جازعان بولاتىنبىز. سونداي-اق باتىس قازاقستان وبلىسىندا 350 گە جۋىق ادام ەۆاكۋاتسيالاندى.
ب ق و-نىڭ قاراتوبە، تەرەكتى اۋداندارىندا توتەنشە جاعداي جاريالاندى. سونىمەن بىرگە باتىس قازاقستان وبلىسىنا ماڭعىستاۋ مەن الماتىدان قۇتقارۋشىلار كومەككە جىبەرىلدى.
اۆتور
عايساعالي سەيتاق
