ب ق و-دا ۆەلوسيپەدىنە جالاۋشا قوندىرىپ، ءانۇراندى شىرقاعان قوس بالاقاي كوپشىلىكتى ءتانتى ەتتى

ورال. KAZINFORM - قاراتوبە اۋدانى ورتالىعى قاراتوبە اۋىلىندا ۆەلوسيپەدىنە كوك تۋدى قوندىرىپ العان التى جاسار اقىلبەكتى كوشەدەن ءجيى كەزدەستىرۋگە بولادى.

قاراتوبە اۋداندىق ىشكى ساياسات ءبولىمىنىڭ باسشىسى نۇرتاس سافۋلليننىڭ Kazinform تىلشىسىنە ءمالىم ەتكەنىندەي، ورتالىق الاڭدا ويناپ جۇرگەن بالالاردىڭ ءبىرى ۆەلوسيپەدىنە مەملەكەتتىك تۋ بەينەلەنگەن جالاۋشانى قوندىرىپ العانىن كورگەن.

«سول بويدا ۆەلوسيپەدتىڭ كىمدىكى ەكەندىگىن سۇراستىردىم. سارى دومالاق سۇيكىمدى بالدىرعان «مەنىكى» دەپ جاۋاپ بەردى. اتى اقىلبەك، جالاۋدى ۆەلوسيپەدىنە اكەسى قوندىرىپ بەرگەن بولىپ شىقتى. قاسىنداعى بالانىڭ ەسىمى قۋانىش ەكەن. «ەلىمىزدىڭ ءانۇرانىن بىلەسىڭدەر مە؟» دەپ ەدىم، قولدارىن جۇرەك تۇسىنا قويىپ، شىرقاي جونەلدى. وسى بەينەجازبانى فەيسبۋك الەۋمەتتىك جەلىسىندەگى پاراقشاما جۇكتەپ ەدىم، قوس بالاقايدىڭ ءتاتتى قىلىعى كوپشىلىكتى ءسۇيسىندىردى. پاتريوت بالالارعا ريزاشىلىعىن ءبىلدىرىپ، اق تىلەگىن جاۋدىرعاندار از بولعان جوق»، - دەيدى نۇرتاس سافۋللين.

التى جاستاعى اقىلبەك اسقاردىڭ اكەسى اسىلانبەك تولەۋعاليەۆتىڭ ايتۋىنشا، ول زايىبى اقزاتپەن بىرگە ءۇش بالا تاربيەلەپ وتىر ەكەن. قىزى ايلينا 8-سىنىپتى، ۇلكەن ۇلى اقنيەت 5-سىنىپتى، اقىلبەك 1-سىنىپتى بىتىرگەن.

«قاراتوبە» سپورت كلۋبى اۋىر اتلەتيكا ۇيىرمەسىنىڭ تاربيەلەنۋشىسى اقنيەت اۋدانىمىزدىڭ، ءوڭىرىمىزدىڭ نامىسىن قورعاپ، بالالار مەن جاسوسپىرىمدەر اراسىندا حالىقارالىق، رەسپۋبليكالىق، وبلىستىق جارىستاردا جۇلدەگەر اتانىپ ءجۇر. باتىس قازاقستان وبلىسى جاسوسپىرىمدەر قۇراما كومانداسىنىڭ مۇشەسى، 1-دارەجەلى سپورتشى. بالالارىمنىڭ بارلىعى دا ءوز ەلىنىڭ، ولكەسىنىڭ پاتريوتى بولىپ ءوسىپ كەلە جاتىر. بۇل مۇحيت اتىنداعى جالپى ورتا ءبىلىم بەرەتىن مەكتەبىندەگى ۇستازدارى بەرگەن ءبىلىمى مەن تاربيەنىڭ يگى جەمىسى دەپ ويلايمىن. اقىلبەك اعاسىنىڭ سپورتتىق جارىستاردا توپ جارعان جۇلدەلەرىن ماقتان تۇتىپ، ەلىمىزدىڭ مەملەكەتتىك رامىزدەرىنىڭ ءبىرى - تۋىمىزدى ۆەلوسيپەدىنە تاعىپ ءجۇر. جالپى، جالاۋدى ءوزىنىڭ قالاۋى بويىنشا تاعىپ بەرۋدى سۇراعان بولاتىن. اقىلبەك مەكتەپتە بولاتىن سىنىپارالىق ءىس-شارالارعا بەلسەنە قاتىسادى. زايىبىم اقزات قايدار قىزى ەسقاليەۆا «قاراتوبە كوللەدجى» م ق ك ك-دە وقىتۋشىلىق قىزمەت اتقارادى»، - دەدى اسىلانبەك اسقار ۇلى.

التى جاسار اقىلبەكتىڭ ءوزى ءانۇراندى مەكتەپتە مۇعالىمى گۇلجانات ماقسوت قىزىنىڭ ۇيرەتكەنىن، قازاق ءتىلى ساباعىن جاقسى كورەتىنىن، بولاشاقتا فۋتبولشى بولعىسى كەلەتىنىن ايتتى.

اقىلبەكپەن ءانۇراندى بىرگە شىرقاعان قۋانىش قۇباي مۇحيت مەكتەبىنىڭ 3-سىنىبىن ءتامامداعان.

«بالام مەكتەپتە ساباعىن جاقسى وقيدى. ەلىن سۇيەتىن ۇلگىلى ۇل بولىپ ءوسىپ كەلە جاتقانىنا قۋانىشتىمىز. اكەسى ريشات جۇماعاليەۆ ەكەۋمىزدىڭ كوزقۋانىشىمىز وسى قۋانىش. بالامىز الداعى ۋاقىتتا دا تەك قۋانتا بەرسە ەكەن دەيمىز»، - دەدى قۋانىشتىڭ اناسى باقىتقانىم تولعانبايەۆا.

اۆتور
عايساعالي سەيتاق