ب ا ءا ءوز تاريحىنداعى رەكوردتىق جاۋىن-شاشىننان كەيىن قالپىنا كەلتىرىلىپ جاتىر
استانا. KAZINFORM -پارسى شىعاناعى مەملەكەتى ەلدە بۇرىن-سوڭدى بولماعان جاۋىن- شاشىننان كەيىن قالپىنا كەلتىرىلىپ جاتىر. بەيسەنبى كۇنى ەلدىڭ باسىم بولىگىندە جاۋعان جاڭبىر توقتادى. ءبىراق تۇرعىنداردىڭ كوپشىلىگى تولاسسىز جاۋعان نوسەردىڭ سالدارىمەن ءالى كۇرەسىپ كەلەدى.
سارسەنبى كۇنى حالىققا جولداۋىندا ب ا ءا پرەزيدەنتى، ءابۋ- دابي بيلەۋشىسى شەيح مۇحامەد بەن زايد ءال ناحايان بيلىك « ب ا ءا - دەگى ينفراقۇرىلىمنىڭ جاعدايىن تەز ارادا تەكسەرىپ، كەلتىرىلگەن زالالدى شەكتەۋگە كوشەتىنىن» ايتتى.
كۋاگەرلەردىڭ ايتۋىنشا، بەيسەنبى كۇنى ادامدار بۇرىن تاستالعان كولىكتەرگە جەتۋ ءۇشىن سۋ تاسقىنى ارقىلى ءوتىپ، قوزعالتقىشتارىنىڭ جۇمىس ىستەپ تۇرعانىن تەكسەرگەن. كوشەلەردە سۋدى تارتىپ شىعارۋ ءۇشىن اۆتوتسيستەرنالار جۇمىس ىستەپ جاتىر. امىرلىك باسشىسى سونداي- اق اۋا رايىنىڭ قولايسىزدىعىنان زارداپ شەككەن بارلىق وتباسىعا قولداۋ كورسەتۋدى، زارداپ شەككەندەردى جەرگىلىكتى بيلىكپەن بىرلەسىپ ءقاۋىپسىز جەرگە كوشىرۋدى بۇيىردى. توتەنشە جاعدايلار قىزمەتكەرلەرى سۋ باسقان جولداردى تازالاۋعا كىرىسىپ، داۋىلدان ۇيلەر مەن كاسىپورىندارعا كەلتىرىلگەن شىعىندى باعالاۋ باستالدى.
مەكتەپتەر كەلەسى اپتاعا دەيىن جابىق. بەيسەنبى كۇنى تاڭەرتەڭ دۋباي حالىقارالىق اۋەجايى (DXB) شەتەلدىك تاسىمالداۋشىلار پايدالاناتىن 1-تەرمينالدا كىرىس رەيستەرىن قابىلداۋدى قايتا باستاعانىن حابارلادى. بۇل رەتتە رەيستەردىڭ ءالى دە كەشىگىپ، توقتاتىلىپ جاتقانى اتاپ ءوتىلدى. كەيىننەن 3-تەرمينالدا Emirates جانە Flydubai رەيستەرىنە تىركەلۋ قايتا اشىلدى.
اۋەجاي بيلىگى اۋەجاي تەرمينالدارىندا ادام كوپ بولۋىنا بايلانىستى جولاۋشىلاردى قولدارىندا اۋە كومپانياسىنىڭ راستالعان برونداۋىمەن عانا كەلۋگە شاقىردى. حابارلانعانداي، جاقىن ماڭداعى جولداردى سۋ باسۋى سەبەبىمەن داۋىل كەزىندە اۋەجايدا قالىپ قويعان جولاۋشىلارعا ازىق- تۇلىكتى تۇنگى ساعات 1 دە جەتكىزىلگەن. داۋىل كەزىندە ۇشۋ-قونۋ جولاعىن سۋ باسۋ سالدارىنان بارلىعى 1244 رەيس توقتاتىلىپ، 41 رەيس باعىتىن وزگەرتتى، دەپ حابارلايدى Khaleej Times.
«داعدارىس ەلدەر مەن قوعامداردىڭ كۇشىن كورسەتەدى. ءبىز باستان وتكەرگەن تابيعي كليماتتىق داعدارىس بارلىق ازاماتتار مەن تۇرعىنداردىڭ ەلىمىزدىڭ ءار تۇكپىرىنە دەگەن زور قامقورلىقتى، سانالىلىقتى، بىرلىك پەن سۇيىسپەنشىلىكتى كورسەتتى»، - دەپ جازدى دۋباي بيلەۋشىسى شەيح مۇحاممەد بەن راشيد ءال- ماكتۋم ح الەۋمەتتىك جەلىسىندە.
