ب ۇ ۇ: 3 اپتادا كورشى ەلدەردەن سيرياعا 50 مىڭنان اسا ادام ورالدى
استانا. KAZINFORM - بىرىككەن ۇلتتار ۇيىمىنىڭ بوسقىندار ءىسى جونىندەگى جوعارعى كوميسسارى فيليپپو گراندي سيرياعا كورشى ەلدەردەن ورالعان بوسقىندار سانى 3 اپتا ىشىندە 50 مىڭنان اسقانىن اتاپ ءوتتى.
انادولى اقپارات اگەنتتىگىنىڭ حابارلاۋىنشا، گراندي X الەۋمەتتىك جەلىسىندە باشار اساد رەجيمى قۇلاعاننان كەيىن سيريالىق بوسقىنداردىڭ ءوز ەلىنە ورالىپ جاتقانى تۋرالى جازدى.
ول كورشى ەلدەردەن وتانىنا ورالعان سيريالىق بوسقىنداردىڭ سانى بىرتىندەپ ارتىپ كەلە جاتقانىن اتاپ ءوتتى. ونىڭ ايتۋىنشا، تەك سوڭعى 3 اپتادا سيرياعا 50 مىڭنان استام ادام ورالدى.
بۇل رەتتە گراندي سيرياداعى ءومىر ءسۇرۋ جاعدايلارى قورقىنىشتى بولىپ قالا بەرەتىنىن، ورالعان ادامدارعا جانە مۇقتاج جاندارعا كوبىرەك گۋمانيتارلىق كومەك كورسەتۋ قاجەت ەكەنىن ايتتى.
ەسكە سالساق، سيريا وپپوزيتسياسى داماسكىنىڭ اساد رەجيمىنەن ازات ەتىلگەنىن جاريالادى. بۇل تۋرالى سيرياداعى ادام قۇقىقتارىن باقىلاۋ ورتالىعى حابارلادى.
كەيىننەن باشار اساد پرەزيدەنتتىك قىزمەتتەن باس تارتىپ، ەلدەن كەتۋ تۋرالى شەشىم قابىلداعانى بەلگىلى بولدى.
16-جەلتوقساندا باشار اساد ەلدەن قاشقان سوڭ العاش رەت مالىمدەمە جاساعانىن جازعان ەدىك.
اۆتور
اينۇر تۋماكبايەۆا
