ب ۇ ۇ: 2024 -جىلى يراندا 900 دەن استام ادام ءولىم جازاسىنا كەسىلدى
استانا. قازاقپارات - 2024 -جىلى يران 901 ادامدى، ونىڭ ىشىندە جەلتوقسان ايىندا 40 قا جۋىق ادامدى ءبىر اپتانىڭ ىشىندە ءولىم جازاسىنا كەستى، دەپ جازادى DW.
بۇل تۋرالى سەيسەنبى، 7-قاڭتاردا بىرىككەن ۇلتتار ۇيىمىنىڭ ادام قۇقىقتارى جونىندەگى جوعارعى كوميسسارىنىڭ كەڭسەسى مالىمدەگەن.
كوپ جاعدايدا ەڭ جوعارى جازا ەسىرتكىگە قاتىستى قىلمىستار ءۇشىن تاعايىندالعان، سونىمەن قاتار ديسسيدەنتتەر مەن 2022 -جىلعى نارازىلىق اكسياسىنا قاتىسقاندار دا ءولىم جازاسىنا كەسىلگەن. سونىمەن قاتار، ءولىم جازاسىنا كەسىلگەن ايەلدەردىڭ سانى ارتتى، دەلىنگەن مالىمدەمە.
2023 -جىلى يراندا 853 ادام ءولىم جازاسىنا كەسىلگەن بولاتىن.
بىرىككەن ۇلتتار ۇيىمىنىڭ ادام قۇقىقتارى جونىندەگى جوعارعى كوميسسارى فولكەر تۇرىك بولىپ جاتقان وقيعالارعا الاڭداۋشىلىق ءبىلدىردى.
- يراندا ءولىم جازاسىنا كەسىلگەن ادامدار سانىنىڭ جىل وتكەن سايىن كوبەيىپ بارا جاتقانى قاتتى الاڭداتادى، يراننىڭ بۇل ۇنەمى ارتىپ كەلە جاتقان «ءولىم جازاسىنا كەسۋ» اعىنىن توقتاتۋدىڭ ۋاقىتى كەلدى، - دەدى ول.
فولكەر تۇرىك تەگەراندى جازانى تۇپكىلىكتى جويۋ ماقساتىندا وعان موراتوري ەنگىزۋگە شاقىردى. تىيىم سالۋ نەمەسە موراتوري الەمنىڭ 170 كە جۋىق ەلىندە ەنگىزىلگەن.
سونداي-اق يران پرەزيدەنتى حيدجاب تۋرالى زاڭعا ۆەتو قويدى.
اۆتور
جاراسقان نۇرىبايەۆ
