ب ۇ ۇ: 2023-جىلدىڭ قازانىنان بەرى گازا سەكتورىندا 28 مىڭنان استام ايەل قازا تاپتى
استانا. قازاقپارات - 2023-جىلدىڭ قازان ايىنان باستاپ گازا سەكتورىندا يزرايل كۇشتەرىنىڭ شابۋىلدارىنان 28 مىڭنان استام ايەل مەن قىز كوز جۇمدى.
بۇل تۋرالى ب ۇ ۇ- نىڭ گۋمانيتارلىق ماسەلەلەردى ۇيلەستىرۋ باسقارماسىنىڭ (OCHA) Reliefweb اقپاراتتىق قىزمەتى ب ۇ ۇ- ايەلدەر (UN Women) قۇرىلىمىنىڭ دەرەكتەرىنە سىلتەمە جاساپ حابارلادى، دەپ جازادى ت ا س س.
- 2023-جىلدىڭ قازان ايىندا باستالعان سوعىستان بەرى گازا سەكتورىندا 28 مىڭنان استام ايەل مەن قىز قازا تاپقان. بۇل دەگەنىمىز - ساعات سايىن ءبىر ايەل مەن ءبىر قىز يزرايل شابۋىلدارىنىڭ سالدارىنان ومىرمەن قوشتاسۋدا. قازا تاپقانداردىڭ اراسىندا مىڭداعان انالار بار، - دەلىنگەن حابارلامادا.
ب ۇ ۇ مالىمەتىنشە، 2025-جىلدىڭ ناۋرىز ايىندا ءبىتىم رەجيمى توقتاعاننان كەيىن گازاداعى جاعداي كۇرت ناشارلاعان. گۋمانيتارلىق كومەكتى جەتكىزۋگە قويىلعان توسقاۋىلدار جاعدايدى ودان ءارى ۋشىقتىرۋدا.
قازىر انكلاۆ اۋماعىنداعى 1 ميلليوننان استام ايەل مەن قىز اشارشىلىقتىڭ وتە اۋىر دەڭگەيىمەن بەتپە-بەت كەلىپ وتىر.
ايتا كەتەيىك، يزرايل پرەمەر-ءمينيسترى بينيامين نەتانياحۋ يزرايل گازا سەكتورىنىڭ بۇكىل اۋماعىن باقىلاۋعا الۋعا نيەتتى ەكەنىن مالىمدەدى.
