ازۋىڭدى كورسەت - پرەمەر- مينيستر ساپاسىز جولداردى قابىلداماۋ جونىندە

  استانا. KAZINFORM – ق ر كولىك مينيسترلىگى «جول اكتيۆتەرى ساپاسىنىڭ ۇلتتىق ورتالىعى» ر م ك باسشىسى بولاتبەك ايتبايەۆ وڭىرلەردە تەرىس قورىتىندى بەرىلگەن جولداردىڭ دا پايدالانۋعا بەرىلگەنىن ايتتى.

«پروبلەمالاردىڭ ءبىرى - جەرگىلىكتى اتقارۋشى ورگاندار جول ساپاسىنا جاسالعان ەكسپەرتيزاعا سالعىرت قارايدى. ءتىپتى ساپا ورتالىعى تەرىس قورىتىندى بەرسە دە، بوتەن زەرتحانالاردىڭ وڭ قورىتىندىسىمەن جەرگىلىكتى ماڭىزداعى جولدار پايدالانۋعا بەرىلىپ جاتىر»، - دەدى ب. ايتبايەۆ ۇكىمەت وتىرىسىندا.

پرەمەر-مينيستر ولجاس بەكتەنوۆ مۇنىڭ سەبەبىن سۇرادى.

«نە كەدەرگى؟ سىزدەردىڭ ەسكەرتۋلەرىڭىز مىندەتتى تۇردە ورىندالۋى ءۇشىن، قورىتىندى بەرىلمەي، اكتىلەرگە قول قويىلماۋى ءۇشىن قانداي شەشىمدەر قابىلداۋ كەرەك؟ مەردىگەرلەرگە ميللياردتاعان قاراجات اۋدارىلدى، ال ساپا جوق»، - دەدى و. بەكتەنوۆ.

ءوز جاۋابىندا ورتالىق باسشىسى بارلىق قاجەتتى شارا قابىلدانعانىن، نورماتيۆتەرگە تۇزەتۋ ەنگىزىلگەنىن جەتكىزدى. بار بولعانى وبلىستار نورماتيۆ تالاپتارىن قاتاڭ ساقتاۋى كەرەك.

«نورماتيۆتەر بار. ءوزىڭىز بەكىتپەيىنشە ەشبىر اكتىگە قول قويىلماۋى كەرەك. ول ءۇشىن ايباتتى اسىرىپ، ازۋ كورسەتۋ كەرەك»، - دەدى پرەمەر- مينيستر.