ازيادا-2025: قىسقى سپورت باسەكەسى تۋرالى قىزىقتى دەرەكتەر
قازاقستان سپورتشىلارى قىسقى ازيا ويىندارىنا التىنشى مارتە قاتىسپاق. وتانداستارىمىز ەڭ العاش 1996-جىلى حاربيندەگى دودادا ونەر كورسەتكەن. بۇل جايىندا تۋريزم جانە سپورت مينيسترلىگى جازدى.

دەرەككە قاراعاندا، بۇگىنگە دەيىن جەرلەستەرىمىز قىسقى ازيادادا 196 مەدال (78 التىن، 62 كۇمىس جانە 56 قولا) جەڭىپ العان.
2017-جىلى ساپپورودا وتكەن ويىنداردا قازاقستان قۇراماسى 32 مەدال ولجالاپ، جالپىكوماندالىق ەسەپتە 4-ورىنعا يە بولعان ەدى.
قازاقستان قۇراماسىنان حاربيندەگى قىسقى ازياداعا 138 سپورتشى (72 ەر جانە 66 ايەل) قاتىسادى. جەرلەستەرىمىز 6 سپورت تۇرىنەن 10 ديستسيپلينادا ونەر كورسەتىپ، 51 مەدال جيىنتىعىن ساراپقا سالادى.
ويىندارعا ازيانىڭ 32 ەلىنەن 1000 نان استام سپورتشى قاتىسىپ، 64 مەدال جيىنتىعى ءۇشىن سىنعا تۇسەدى.
سكي-الپينيزم سپورتى العاش رەت ازيا ويىندارىنىڭ باعدارلاماسىنا ەنگىزىلىپ وتىر.
حاربينگە باراتىن دەلەگاتسيانىڭ جارتىسىنان استامى استانا، الماتى قالالارىنان جانە شىعىس قازاقستان وبلىسىنىڭ سپورتشىلارى.
سونداي-اق تاعى 10 ءوڭىردىڭ سپورتشىلارى ونەر كورسەتەدى.
تۋ ۇستاۋشىلار - ءادىل بەكەتايەۆ (شايبالى حوككەي) پەن ولگا تيحونوۆا (شورت-ترەك).
قازىرگى قۇرامنان بۇعان دەيىنگى قىسقى ازيا ويىندارىندا چەمپيون اتانعان سپورتشىلار:
• ولگا پولتورانينا (بياتلون، 2011-جىلعى چەمپيون)
• ەۆگەنيي رىماريەۆ (شايبالى حوككەي، 2011-جىلعى چەمپيون)
• رومان ستارچەنكو (شايبالى حوككەي، 2011-جىلعى چەمپيون)
• داريا كليمينا (بياتلون، 2017-جىلعى چەمپيون)
• كيريلل ساۆيتسكيي (شايبالى حوككەي، 2017-جىلعى چەمپيون)
• دميتري گرەنتس (شايبالى حوككەي، 2017-جىلعى چەمپيون)
ەڭ جاس سپورتشى - اسان اسىلحان (فريستايل- اكروباتيكا، 15 جاستا).
ەڭ ەگدە سپورتشى - دەنيس ۆلاسوۆ (سكي-الپينيزم، 41 جاستا).
ازيا ويىندارىنىڭ سالتاناتتى اشىلۋى (7-اقپان) جانە جابىلۋ ءراسىمى (14-اقپان) حاربيندەگى Harbin International Convention and Exhibition Centre Stadium سپورت نىسانىندا وتەدى.
ازيادانىڭ بويتۇمارى - ءسىبىر جولبارىستارى بينبين مەن نيني. ۇرانى: «ازياداعى قىسقى ارمان مەن ماحاببات».
قىتايدىڭ حاربينى قىسقى ازيا ويىندارىن بيىل ەكىنشى رەت قابىلدايدى. بۇعان دەيىن بۇل قالادا 1996-جىلعى ازيادا وتكەن بولاتىن. جالپى، قىتايدا قىسقى سارى قۇرلىق باسەكەسى ءۇشىنشى مارتە وتكەلى تۇر.
ازيادانىڭ سالتاناتتى بولىگى مەن جارىستار 7 سپورت نىسانىندا وتەدى. اتاپ ايتقاندا: حاربين حوككەي ارەناسى؛ حالىقارالىق حاربين كونگرەسس-كورمە جانە سپورت ورتالىعى؛ حاربيندەگى پينفان اۋدانىنىڭ حوككەي ارەناسى؛ حاربين سپورت ۋنيۆەرسيتەتىنىڭ مۇزايدىنى؛ حەيلۋنتسزيان كوپفۋنكتسيونالدى زالى؛ حەيلۋنتسزيان وقۋ ورتالىعىنىڭ مۇزداعى جارىستارعا ارنالعان زالى؛ يابۋلي تاۋ-شاڭعى كۋرورتى.
ايتا كەتەيىك، بۇعان دەيىن قىسقى ازياداعا قاتىساتىن حوككەيدەن قازاقستان قۇراماسى بەلگىلى بولدى.