ازيادا-2026: ات سپورتىنان جەكەلەي سىندى قازاقستاندىق شاباندوز اشادى
استانا. قازاقپارات – 3-قازان كۇنى توكيوداعى Equestrian Park كەشەنىندە ازيا ويىندارى اياسىنداعى ات سپورتىنان ەڭ تارتىستى باسەكەلەردىڭ ءبىرى - كونكۋردان جەكەلەي بىرىنشىلىكتىڭ (Jumping Ind A) ءبىرىنشى راۋندى باستالادى. بۇل سىندا قۇرلىقتىڭ ەڭ مىقتى شاباندوزدارىمەن قاتار قازاقستان نامىسىن 4 سپورتشى قورعايدى.
جارىس حالىقارالىق «ا» كەستەسى بويىنشا ۋاقىتقا باعىنا وتىرىپ وتەدى (Table A، against the clock) . سپورتشىلار ءۇشىن باستى مىندەت - بيىكتىگى 145 س م باستاپ 155 س م دەيىن جەتەتىن كۇردەلى كەدەرگىلەردى قاتەسىز ءارى بارىنشا جىلدام ەڭسەرۋ. مۇنداعى بەلگىلەنگەن قوزعالىس جىلدامدىعى - مينۋتىنا 400 مەتر.
تۋرنيرگە ازيا ايماعىنىڭ 13 ەلىنەن، سونىڭ ىشىندە قازاقستان، وزبەكستان، ءباا، ساۋد ارابياسى، جاپونيا، وڭتۇستىك كورەيا جانە قاتاردان جيىنتىعى 29 سپورتشى قاتىسادى.
جارىس جولىنا ەڭ العاشقى بولىپ قازاقستاندىق شاباندوز شىعادى. اتاپ ايتقاندا، قازاقستاندىق سپورتشىلاردىڭ ستارتتىق رەتى كەلەسىدەي:
1. كسەنيا باتالوۆا جارىستى اشاتىن ساپتا كوش باستاپ، LADY DI ەسىمدى سۇر بيەسىمەن 1-بولىپ شىعادى.
2. رايسا سوكولەنكو ءتۋرنيردىڭ ەكىنشى بولىگىندە URAN NAD WIGRAMI تۇلپارىمەن 22-بولىپ ونەر كورسەتەدى.
3. نۇريلا تۇرىسبەكوۆا QUIBELLE VAN D'ABELENDREEF اتتى سايگۇلىگىمەن 26-نومىردە باق سىنايدى.
4. ولەگ سوكولەنكو وتاندىق شەبەرلەردىڭ ونەرىن قورىتىندىلاپ، CINDERELLA تورى بيەسىمەن 27-بولىپ شابادى.
قازاقستان ۇلتتىق قۇراماسىنىڭ سپورتشىلارى كۇردەلى مارشرۋت پەن قۇرلىقتىڭ ەڭ مىقتى اتتارىنا قارسى تۇرىپ، ازيا ويىندارىنىڭ جوعارى تۇعىرىنان كورىنۋدى كوزدەيدى.
جارىس استانا ۋاقىتىمەن ساعات 05:30 دا باستالادى.
