ازيا ويىندارىنىڭ جابىلۋ سالتاناتى ءوتتى
بۇگىن قىتايدىڭ حاڭجوۋ قالاسىندا ءوتىپ جاتقان ازيا ويىندارىنىڭ جابىلۋ سالتاناتى ءوتتى، دەپ حابارلايدى قازاقپارات ءتىلشىسى.

ءدۇبىرلى دودادا ازيا وليمپيادا كەڭەسى (ا و ك) قۇرامىنداعى 45 ەلدەن 12500 دەن استام سپورتشى كەلگەنىن اتاپ ءوتتى. بۇل - رەكوردتىق كورسەتكىش. 2018 -جىلى يندونەزيادا وتكەن ازيادادا 11300 ادام تىركەلىپ، جاڭا رەكوردتىق كورسەتكىش ورناعان ەدى.
حاڭجوۋداعى ازيا ويىندارى 1990 -جىلعى بەيجىڭ مەن 2010 -جىلعى گۋاڭجوۋدان كەيىنگى قىتايدا وتكەن ءۇشىنشى ازيا ويىندارى رەتىندە ەرەكشەلەندى.

بيىل ەلىمىزدىڭ اتىنان حاڭجوۋ قالاسىندا 30 سپورت تۇرىنەن 524 قازاقستاندىق ساڭلاق باق سىنادى.
وتاندىق سپورتشىلار قورجىنىندا 80 مەدال (10 التىن، 22 كۇمىس، 48 قولا) جينالدى. وسىلايشا، قورىتىندى مەدالدىق ەسەپتە قازاقستان 11-شى ورىنعا جايعاستى.

قازاقستاندىق سپورتشىلار بيىل سەگىزىنشى مارتە ازيا ويىندارىنا قاتىسىپ وتىر. بۇعان دەيىن جالپى كوماندالىق ەسەپتە 1994 -جىلى - 4 (77 مەدال: 25 التىن، 26 كۇمىس، 26 قولا)، 1998 -جىلى - 5 (78 مەدال: 24 التىن، 24 كۇمىس، 30 قولا)، 2002 -جىلى - 4 (76 مەدال: 20 التىن، 26 كۇمىس، 30 قولا)، 2006 -جىلى - 4 (85 مەدال: 23 التىن، 20 كۇمىس، 42 قولا)، 2010 -جىلى - 5 (79 مەدال: 18 التىن، 23 كۇمىس، 38 قولا)، 2014 -جىلى - 4 (84 مەدال: 28 التىن، 23 كۇمىس، 33 قولا)، 2018 -جىلى - 9-ىنشى (76 مەدال: 15 التىن، 17 كۇمىس، 44 قولا) ورىن الدى.
ال ءتورت سپورتشىمىز 2024 -جىلعى پاريج وليمپياداسىنا جولداماعا قول جەتكىزدى. ولاردىڭ قاتارىندا بەسسايىستان ەلەنا پوتاپەنكو مەن گەورگي بورودا- دۋدوچكين، بوكسشىلار قامشىبەك قوڭقابايەۆ پەن كارينا يبراگيموۆا بار.
ەندى ازيا ويىندارى 2026 -جىلى 19-قىركۇيەك پەن 4-قازان ارالىعىندا جاپونيانىڭ ناگويا قالاسىندا وتكىزىلەدى.