ازيا ويىندارى: ەسكەك ەسۋ جارىسىندا قازاقستاندىقتار جالپىكوماندالىق ەسەپتە ەكىنشى ورىن الدى
قىتايدىڭ حاڭجوۋ قالاسىندا ءوتىپ جاتقان XIX جازعى ازيا ويىندارىندا كانوە مەن بايداركادا ەسكەك ەسۋ جارىسى مارەسىنە جەتتى.

ەل قۇراماسى جالپىكوماندالىق ەسەپتە ەكىنشى ورىن الدى، دەپ حابارلايدى قازاقپارات ءتىلشىسى.
ۇلتتىق قۇراما بارلىق باعدارلامادا فينالعا جەتىپ، 8 (1 التىن، 4 كۇمىس جانە 3 قولا) جۇلدەگە قول جەتكىزدى.
قازاقستاندىق ەسكەكشىلەر سەرگەي ەمەليانوۆ پەن تيمۋر حايداروۆ كانوەدا 500 مەتر قاشىقتىقتا مارە سىزىعىن ءبىرىنشى بولىپ قيدى.
اعايىندى تيموفەي مەن سەرگەي ەمەليانوۆ كانوە ەسۋدەن 1 مىڭ مەتر قاشىقتىقتا مارەگە ەكىنشى بولىپ جەتتى.
قازاقستاندىقتار مارگاريتا تورلوپوۆا مەن ۋليانا كيسەليەۆا قىتايدىڭ حاڭچوۋ قالاسىندا ءوتىپ جاتقان ازيا ويىندارىندا 200 مەتر قاشىقتىقتا كانوەدان جۇپتاسىپ باق سىناۋدا ەكىنشى ورىن الدى.
سونداي-اق، 500 مەتر قاشىقتىققا كانوەدە جۇپتىق ەسۋدەن كوماندالىق سايىستا رۋفينا يسكاكوۆا مەن ماريا بروۆكوۆا كۇمىس جۇلدەگە يە بولدى.
ال ەل قۇراماسىنان ماريا بروۆكوۆا ءبىر ادامدىق كانوەدا 200 مەتر قاشىقتىقتا مارە سىزىعىن ءۇشىنشى بولىپ قيدى.
ناتيجەسىندە جالپىكوماندالىق ەسەپتە ەكىنشى ورىن الدى. العاشقى ورىندا قىتاي (9 التىن) قۇراماسى تۇرسا، ۇزدىك ۇشتىكتى وزبەكستان قۇراماسى (6 مەدال) تۇيىندەدى.