ازيا ويىندارى: قازاقستان مەدالدار كەستەسىندە توعىزىنشى ورىنعا كوتەرىلدى
قىتايدىڭ حاڭجوۋ قالاسىندا ءوتىپ جاتقان ازيا ويىندارىندا قازاقستان قۇراماسى توعىزىنشى ورىنعا كوتەرىلدى، دەپ حابارلايدى قازاقپارات ءتىلشىسى.

كاراتەشى سوفيا بەرۋلسيەۆا جەڭىمپاز اتانعاننان كەيىن قازاقستاندىقتار العان التىن مەدال سانى ونعا جەتتى.
وسىلايشا، قازاقستان قۇراماسى باحرەيندى باسىپ وزىپ، 10 نان 9-ساتىعا جايعاستى.
باحرەيندە دە ون التىن، ءبىراق ولاردىڭ كۇمىسى مەن قولاسى الدەقايدا كەم.
قازىرگى كەزدە قازاقستان قورجىنىندا 10 التىن، 20 كۇمىس، 44 قولا مەدال بار.
مەدالدار كەستەسىندە قىتاي قۇراماسى (187 التىن، 104 كۇمىس، 62 قولا) جەكەدارا كوش باستاسا، ودان كەيىن جاپونيا (47، 57، 62)، كورەيا (36، 49، 84)، ءۇندىستان (22، 34، 39)، وزبەكستان (20، 18، 26) سپورتشىلارى كەلەدى.
ازيا ويىندارى ەرتەڭ مارەسىنە جەتەدى.
ەسكە سالا كەتەيىك، بۇدان بۇرىن ازيا ويىندارىندا سوفيا بەرۋلسيەۆانىڭ قازاقستان قورجىنىنا ونىنشى التىندى سالعانىن جازعان ەدىك.