ازيا ويىندارىنىڭ جۇلدەگەرلەرى الماتىعا ورالدى

الماتى حالىقارالىق اۋەجايىنا سپورتشىلاردى اكىمدىك پەن فەدەراتسيالار وكىلدەرى، ولاردىڭ تۋعان-تۋىستارى مەن دوستارى سالتاناتتى تۇردە قارسى الدى.

ەلگە ورالعان وتانداستارىمىزدىڭ قاتارىندا اۋىر اتلەتيكادان ازيا ويىندارىنىڭ كۇمىس جۇلدەگەرلەرى نۇرعيسا ادىلەت ۇلى جانە ايانات جۇماعالي، جەڭىل اتلەتيكادان ازيادانىڭ كۇمىس جۇلدەگەرلەرى كريستينا موروزوۆا (جارتىلاي مارافون قاشىقتىعىنداعى سپورتتىق ءجۇرىس)، كريستينا وۆچيننيكوۆا (بيىكتىككە سەكىرۋ)، نورا دجەرۋتو (300 م كەدەرگىلەر ارقىلى جۇگىرۋ)، كۋراشتان ازيا ويىندارىنىڭ قولا جۇلدەگەرى ادىلەت احمەتعالي، سونداي-اق مارافوندىق سپورتتىق جۇرىستەن سىنعا تۇسكەن جەڭىل اتلەت ياسمينا توقسانبايەۆا بار.

اۋەجايدا سپورتشىلار ب ا ق وكىلدەرىنە سۇحبات بەرىپ، ءوز اسەرلەرىمەن ءبولىستى. ولاردىڭ ءبىرى - نۇرعيسا ادىلەت ۇلى بولدى.

- بۇل جارىسقا جىل باسىنان بەرى دايىندالدىق دەۋگە بولادى. التىنعا كىشكەنە جەتپەدى، كۇمىس الدىق. ەندى كوپ دەمالۋعا ۋاقىت جوق. جاقىندا قىتايدا الەم چەمپيوناتى، سوعان شىمكەنتتە وقۋ-جاتتىعۋدى باستايمىز. باستى ماقساتىم - وليمپياداعا جولداما الىپ، وندا التىن جەڭۋ. قاتەلىكتەرمەن جۇمىس ىستەپ، وسى ماقساتتى ەڭبەك ەتەمىز، - دەدى ازيادانىڭ كۇمىس جۇلدەگەرى.

كۋراشتان ازيا ويىندارىنىڭ قولا جۇلدەگەرى ادىلەت احمەتعالي دا جاپونياداعى جارىستان كەيىن كەلەسى دوداعا دايىندىقتى باستايتىنىن ايتتى.

- الماتى قالاسىندا ءبىزدى جاقسى كۇتىپ الدى. ازيا ويىندارىندا قولا جۇلدە جەڭىپ الدىم. التىن ءۇشىن باردىق، ءبىراق بۇيىرعانى وسى بولدى. جالپى جارىس جوعارى دەڭگەيدە ءوتتى. الداعى جوسپارىم، استانادا وتەتىن الەم چەمپيوناتىندا جەڭىسكە جەتۋ، - دەدى ول.

ەسكە سالايىق، بۇگىن دزيۋدوشى ادىلەت المات العاش رەت جازعى ازيادانىڭ كۇمىس جۇلدەگەرى اتاندى.

سونداي-اق ەسميگۋل كۋيۋلوۆا وسىمەن ەكىنشى رەت دزيۋدودان ازيادانىڭ قولا جۇلدەسىن الدى.

جىبەك قۇلىمبەتوۆا دجيۋ-دجيتسۋدان ازيادانىڭ قولا جۇلدەسىن جەڭىپ الدى.

ال نۇرجان باتىربەكوۆ دجيۋ-دجيتسۋدان كۇمىس جۇلدە ەنشىلەدى.