ازيا پارا ويىندارى: حاڭجوۋدا قازاقستان تۋى كوتەرىلدى
بۇگىن، 21-قازاندا حاڭجوۋداعى پارا اتلەتيكالىق اۋىلدا قازاقستاننىڭ مەملەكەتتىك تۋىن سالتاناتتى تۇردە كوتەرۋ ءراسىمى ءوتتى. وسىلايشا، بۇگىننەن باستاپ قازاقستان قۇراماسى رەسمي تۇردە IV ازيا پارا ويىندارىنىڭ سايىستارىنا قاتىسۋعا مۇمكىندىك الدى، دەپ حابارلايدى Kazinform تۋريزم جانە سپورت مينيسترلىگىنىڭ باسپا ءسوز قىزمەتىنە سىلتەمە جاساپ.
ءىس-شاراعا قازاقستان قۇراماسىنىڭ سپورتشىلارى مەن سپورت سالاسىنىڭ ماماندارى قاتىستى.
«قازاقستان قۇراماسى ازيا ويىندارىنا امان-ەسەن جەتتى. ءبىزدىڭ سپورتشىلار كلاسسيفيكاتسيادان ءساتتى ءوتىپ، وزدەرىنىڭ سپورت كلاسىن راستادى. سپورتشىلاردىڭ كلاسى پاراليمپيادالىق سپورتتا شەشۋشى ءرول اتقارادى، بۇل بارلىق قاتىسۋشىلار ءۇشىن ءادىل جارىستاردى قامتاماسىز ەتەدى. ەندى ءبىزدىڭ الدىمىزدا قۇندى مەدالدار ءۇشىن قارقىندى كۇرەس تۇر. قارسىلاستارىمىز وسال ەمەس. وسى حاڭجوۋ-2022 پارا ويىندارىنا ەلىمىزدىڭ تاراپىنان سپورتتىڭ 14 ءتۇرى بويىنشا 131 سپورتشى قاتىسادى. بۇل قازاقستاننىڭ ازيا پارا ويىندارى تاريحىنداعى قاتىسۋشىلار سانى بويىنشا جاڭا رەكورد. الدىڭعى ويىندارعا قازاقستاننان 9 سپورت تۇرىنەن 91 سپورتشى قاتىسىپ، 33 جۇلدەگە قول جەتكىزگەن بولاتىن. بيىلعى جىلى ودان دا كوپ مەدال اكەلەمىز دەپ ۇمىتتەنەمىز»، - دەدى ۇلتتىق پاراليمپيادا كوميتەتىنىڭ باس حاتشىسى ەرلان سۇلەيمەنوۆ.
قازاقستان تۋىن كوتەرۋ راسىمىنە قاتىسقان پارا پاۋەرليفتيگتەن توكيو-2020 پاراليمپيادا ويىندارىنىڭ جەڭىمپازى، الەم جانە ازيا چەمپيونى داۆيد دەگتياريەۆ سالتاناتتى ءىس-شارادان العان اسەرىمەن ءبولىستى.
«بۇگىن حاڭجوۋدا ەلىمىزدىڭ تۋى كوتەرىلدى. وزگە ەلدە قازاقستاننىڭ تۋى جەلبىرەپ تۇرعانى ءاردايىم قۋانتادى. ەلىمىزدىڭ كوك بايراعىن وسىلاي بيىكتەن جەلبىرەتۋگە بار كۇشىمىزدى سالامىز»، - دەدى ول.
ايتا كەتسەك، IV ازيا پارا ويىندارى 22-28-قازان ارالىعىندا حاڭجوۋ (ق ح ر) قالاسىندا وتەدى. جارىسقا 22 سپورت تۇرىنەن 43 مەملەكەتتەن 4000 عا جۋىق سپورتشى قاتىسادى.
