ازەربايجاندىق ساياساتتانۋشى قازاقستانداعى ومبۋدسمەن ينستيتۋتىنىڭ مۇمكىندىكتەرىن اتادى
استانا. KAZINFORM - قازاقستاندا ادام قۇقىقتارى جونىندەگى ۋاكىل ينستيتۋتىنىڭ ءرولى، ونىڭ ىشىندە وڭىرلەردەگى وكىلدەر جەلىسىنىڭ دامۋىنا بايلانىستى كۇشەيىپ كەلەدى.
بۇل تۋرالى «وڭتۇستىك كاۆكاز» ساياساتتانۋشىلار كلۋبىنىڭ جەتەكشىسى يلگار ۆەليزادە مالىمدەدى.
ساياسات تانۋشى نەگىزگى وزگەرىستەردىڭ ءبىرى رەتىندە 2022-جىلى قابىلدانعان زاڭدى اتادى. ونىڭ پىكىرىنشە، بۇل قۇجات ادام قۇقىقتارى جونىندەگى ۋاكىلدىڭ جۇمىسىنا جاڭا ءتاسىل قالىپتاستىرۋعا نەگىز بولىپ، مەملەكەتتىك ورگاندارمەن ءوزارا ءىس-قيمىل بارىسىندا ينستيتۋتتىڭ مۇمكىندىكتەرىن كەڭەيتتى.
- ەڭ الدىمەن، بۇل زاڭ ومبۋدسمەننىڭ قازاقستان ازاماتتارىنىڭ كونستيتۋتسيالىق قۇقىقتارى مەن بوستاندىقتارىن ىسكە اسىرۋعا قاتىستى ماسەلەلەردى مەملەكەتتىك ورگاندار الدىنا قويۋ جانە ولاردىڭ ورىندالۋىن تالاپ ەتۋ قۇقىعىن ينستيتۋتسيونالدىق تۇرعىدان بەكىتتى، - دەدى ۆەليزادە.
ساياسات تانۋشى ومبۋدسمەننىڭ وڭىرلەردەگى وكىلدەرىنىڭ جۇمىسىنا دا جەكە توقتالدى. ونىڭ ايتۋىنشا، ولار جەرگىلىكتى جەرلەردەگى بۇكىل جۇيەنىڭ ماڭىزدى بۋىنى سانالادى.
- وڭىرلىك ومبۋدسمەندەردىڭ ءرولى وتە ماڭىزدى. بۇل جۇيەنىڭ جاڭا جاعدايلاردا قانشالىقتى ءتيىمدى ءارى ازاماتتاردىڭ ماسەلەسىنە قانشالىقتى سەزىمتال جۇمىس ىستەيتىنى ولاردىڭ قىزمەتىنە بايلانىستى، - دەپ اتاپ ءوتتى ساياساتتانۋشى.
ۆەليزادەنىڭ پىكىرىنشە، ومبۋدسمەننىڭ ءتۇرلى ينستانتسياداعى سوتتارمەن جانە قۇقىق قورعاۋ ورگاندارىمەن ءوزارا ءىس-قيمىلى دا ماڭىزدى. بۇل ازاماتتارعا ءوز قۇقىقتارىن قورعاۋ جانە كونستيتۋتسيالىق قۇقىقتارىنىڭ ىسكە اسۋىنا قول جەتكىزۋ ءۇشىن قوسىمشا مۇمكىندىك بەرەدى.
ساياسات تانۋشى ومبۋدسمەن ينستيتۋتىنداعى وزگەرىستەردى سوڭعى جىلدارداعى ساياسي رەفورمالار اياسىندا قاراستىرادى. ونىڭ ايتۋىنشا، بۇل رەفورمالار مەملەكەتتىك ينستيتۋتتاردى جەتىلدىرۋگە جانە بيلىك پەن قوعام اراسىنداعى ديالوگتى نىعايتۋعا باعىتتالعان.
«حالىق ۇنىنە قۇلاق اساتىن مەملەكەت» تۇجىرىمداماسى
يلگار ۆەليزادە «حالىق ۇنىنە قۇلاق اساتىن مەملەكەت» تۇجىرىمداماسىنا دا توقتالدى. ونىڭ سوزىنشە، تۇجىرىمدامانىڭ نەگىزگى باعىتتارىنىڭ ءبىرى - ادام قۇقىقتارىن قامتاماسىز ەتۋ.
- قازاقستان پرەزيدەنتى ەل تاعدىرىنا قاتىستى ماڭىزدى شەشىمدەر قابىلداۋ كەزىندە قالىڭ بۇقارانىڭ مۇددەسىن ەسكەرۋدىڭ قاجەتتىلىگىنە نازار اۋدارادى. سونىمەن قاتار ازاماتتاردىڭ قۇقىقتارى مەن مىندەتتەرىنە، اسىرەسە جەرگىلىكتى جەرلەردە، مۇقيات قاراۋ كەرەك ەكەنىن دە بىلەدى، - دەدى ۆەليزادە.
ساراپشى ومبۋدسمەن ينستيتۋتىن ودان ءارى جەتىلدىرۋدى مەملەكەتتىك باسقارۋ جۇيەسىن دامىتۋ ۇدەرىسىمەن بايلانىستىرادى.
- ومبۋدسمەن ينستيتۋتىن جەتىلدىرۋ مەملەكەتتىك باسقارۋ تاجىريبەسىن جەتىلدىرۋمەن قاتار، «حالىق ۇنىنە قۇلاق اساتىن مەملەكەت» تۇجىرىمداماسىن عانا ەمەس، قازاقستان قوعامىنىڭ الداعى جىلدارداعى دامۋ تۇجىرىمداماسىن دا ىسكە اسىرۋدىڭ كەپىلى، - دەپ قورىتىندىلادى يلگار ۆەليزادە.
