ازەربايجانىڭ مەملەكەتتىك قاۋىپسىزدىك قىزمەتى تەراكتىنىڭ الدىن الدى

استانا. KAZINFORM - ازەربايجانداعى شابۋىلداردى جوسپارلاعان ادام قاماۋعا الىندى. مەملەكەتتىك قاۋىپسىزدىك قىزمەتى جۇرگىزگەن تەرگەۋ بارىسىندا رەسەي فەدەراتسياسىنىڭ مۋرمانسك قالاسىندا تۇراتىن ازەربايجان رەسپۋبليكاسىنىڭ ازاماتى اسكەروۆ باحرۋز اليمامەد وگلۋ (1988 -جىلى تۋعان) قولعا ءتۇستى.

بۇل تۋرالى ازەربايجاننىڭ azertag.az مەملەكەتتىك اقپارات اگەنتتىگى حابارلادى.

اسكەروۆ باحرۋز اليمامەد وگلۋ ەلدەگى قوعامدىق قاۋىپسىزدىكتى بۇزۋ، حالىق اراسىندا دۇربەلەڭ تۋعىزۋ جانە وعان ىقپال ەتۋ ماقساتىندا باسقا ادامدارمەن بايلانىسقا ءتۇستى دەگەن كۇدىككە الىندى. كۇدىكتىنىڭ كوپتەگەن ادام ءولۋى ءتيىس تەرروريستىك اكت جاساۋعا نيەتتەنگەنى دە ايتىلۋدا.

باحرۋز اسكەروۆ جاسىرىن تۇردە رەسپۋبليكانىڭ ءارتۇرلى ايماقتارىندا تۇراتىن ادامداردى بايلانىسقا تارتىپ، ليانكاران قالالىق اتقارۋشى بيلىگىنىڭ باسشىسىنا قاستاندىق جاساۋ ماقساتىندا ولارعا نۇسقاۋلار بەرگەنى انىقتالدى.

سونداي-اق، باحرۋز اسكەروۆ ونىمەن بايلانىستا بولعان ادامدارعا ازەربايجاننىڭ كەيبىر اۋداندارىندا اعىلشىن ءتىلى مۇعالىمى بولىپ جۇمىس ىستەيتىن شەتەل ازاماتىنا قارسى قاستاندىق جاساۋدى تاپسىرعانى انىقتالىپ وتىر.

جۇرگىزىلگەن كەشەندى جەدەل-تەرگەۋ ءىس-شارالارىنىڭ ناتيجەسىندە باحرۋز اسكەروۆ ازەربايجان رەسپۋبليكاسى قىلمىستىق كودەكسىنىڭ 28، 214.2.1 (تەرروريزمگە دايىندىق) باپتارى بويىنشا ۇستالىپ، قىلمىستىق جاۋاپكەرشىلىككە تارتىلدى، وعان قاتىستى سوت شەشىمىمەن قاماۋعا الۋ تۇرىندەگى بۇلتارتپاۋ شاراسى قولداندى.

اۆتور
ورالحان قوجانوۆ