ازەربايجانداعى پرەزيدەنت سايلاۋى: ت م د باقىلاۋشىلار ميسسياسىن كىم باسقارادى

Әзербайжандағы президент сайлауы: ТМД бақылаушылар миссиясын кім басқарады
Фото: e-cis.info

ازەربايجان پرەزيدەنتىن كەزەكتەن تىس سايلاۋدا تاۋەلسىز مەملەكەتتەر دوستاستىعى اتىنان باقىلاۋشىلار ميسسياسىن باس حاتشى سەرگەي لەبەديەۆ باسقارادى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

سەرگەي لەبەديەۆتىڭ ۇمىتكەرلىگى دوستاستىقتىڭ جارعىلىق جانە باسقا ورگاندارى جانىنداعى ت م د ەلدەرىنىڭ تۇراقتى وكىلەتتى وكىلدەرى كەڭەسىنىڭ شەشىمىمەن كەلىسىلدى.

ت م د باقىلاۋشىلارىنىڭ ميسسياسى ازەربايجان ۇكىمەتىنىڭ شاقىرۋىمەن سايلاۋ ناۋقانىنا مونيتورينگ جۇرگىزەدى. ت م د اتقارۋشى كوميتەتى دوستاستىق ەلدەرىنە ءوز وكىلدەرىنىڭ ۇمىتكەرلەرىن ميسسيا قۇرامىنا قوسۋدى سۇراپ، شاقىرۋ جىبەردى.

ازەربايجاندا 2024-جىلدىڭ 7- اقپانىندا كەزەكتەن تىس پرەزيدەنت سايلاۋى وتەتىنىن ەسكە سالا كەتەيىك.

قازىرگى ۋاقىتتا پرەزيدەنتتىككە ۇمىتكەرلەر سانى 17 گە جەتتى.

19- جەلتوقساندا ورتالىق سايلاۋ كوميسسياسى (و س ك) يلحام گەيدار وگلۋ اليەۆتىڭ كانديداتۋراسىن «ەني ازەربايجان» پارتياسىنىڭ اتىنان پرەزيدەنت لاۋازىمىنا ۇمىتكەر رەتىندە تىركەدى. سونداي-اق ءار الەۋمەتتىك زەرتتەۋلەر ورتالىعى باسقارماسىنىڭ ءتوراعاسى زاحيد ورۋدج جانە ءار ميللي مەدجليسىنىڭ VI شاقىرىلىم دەپۋتاتى رازي نۋرۋللايەۆ تىركەلگەن بولاتىن.

26- جەلتوقساندا تالقىلاۋ مەن داۋىس بەرۋدەن كەيىن وسك پرەزيدەنت سايلاۋىنا سارۆان كەريموۆ، ماتلابا مۋتالليملي، ابۋتالىب سامەدوۆ، فيكرەت يۋسيفوۆ، يۋسيف باگيرزادە، ارزۋمان ابدۋلكەريموۆ، يۋنۋس وگۋز بەن گۋلامگۋسەين اليبەيليدىڭ، ال 30- جەلتوقساندا ءوزىن ءوزى ۇسىنعان ناميزادا گەيدار وگلۋ سافاروۆتىڭ ۇمىتكەرلىگىن بەكىتتى.

ازەربايجاندا كەيىنگى پرەزيدەنت سايلاۋى 2018-جىلعى 11- ساۋىردە بولعان. ونىڭ قورىتىندىسى بويىنشا، مەملەكەت باسشىسى يلحام اليەۆ %86,22 داۋىس جينادى. ياعني، ونى 3,192 ميلليون ادام قولداعان. سايلاۋعا قاتىسۋ كورسەتكىشى - %74,51، جالپى 3,959 ميلليون ادام داۋىس بەرگەن.

سوڭعى جاڭالىقتار