ازەربايجاندا پرەزيدەنت يلحام اليەۆتى ۇلىقتاۋ ءراسىمى ءوتتى
باكۋ. KAZINFORM – 14- اقپان كۇنى ميللي مەدجليستە (پارلامەنتتە) كەزەكتەن تىس پرەزيدەنتتىك سايلاۋدا جەڭىسكە جەتكەن ازەربايجان رەسپۋبليكاسىنىڭ پرەزيدەنتى يلحام اليەۆتى ۇلىقتاۋ ءراسىمى ءوتتى.
پرەزيدەنت يلحام اليەۆ ازەربايجان رەسپۋبليكاسىنىڭ كونستيتۋتسياسىنا قولىن قويىپ، انت بەردى: «ازەربايجان رەسپۋبليكاسى پرەزيدەنتىنىڭ وكىلەتتىكتەرىن جۇزەگە اسىرا وتىرىپ، ازەبايجان رەسپۋبليكاسىنىڭ كونستيتۋتسياسىن ساقتاۋعا، مەملەكەت تاۋەلسىزدىگى مەن اۋماقتىق تۇتاستىعىن قورعاۋعا، حالقىنا ابىرويمەن قىزمەت ەتۋگە انت ەتەمىن».
يلحام اليەۆ سونداي-اق قۇرانعا قول قويىپ انت بەردى. ودان كەيىن پرەزيدەنت يناۋگۋراتسيا راسىمىندە ءسوز سويلەپ، بەسىنشى مەرزىمگە مەملەكەت باسشىسى قىزمەتىنە كىرىستى.
يلحام اليەۆ سونداي-اق ازەربايجان مينيسترلەر كابينەتى مۇشەلەرىنىڭ وكىلەتتىكتەرىن ورىنداۋ تۋرالى قاۋلىعا قول قويدى. ۇكىمەتتىڭ جاڭا قۇرامى قۇرىلعانعا دەيىن مينيسترلەر كابينەتىنىڭ وكىلەتتىكتەرىن جۇزەگە اسىرۋ ونىڭ بۇرىنعى قۇرامىنا جۇكتەلەدى.
ەسكە سالا كەتسەك، ازەربايجان كونستيتۋتسياسىنىڭ 116-بابىنا سايكەس (ازەربايجان رەسپۋبليكاسى مينيسترلەر كابينەتىنىڭ وتستاۆكاسى) جاڭادان سايلانعان ازەربايجان رەسپۋبليكاسىنىڭ پرەزيدەنتى قىزمەتىنە كىرىسىپ، ءوز وكىلەتتىكتەرىن جۇزەگە اسىرۋعا كىرىسكەن كۇنى ازەربايجان رەسپۋبليكاسىنىڭ مينيسترلەر كابينەتى وتستاۆكاعا شىعادى.
ازەربايجاندا كەزەكتەن تىس پرەزيدەنت سايلاۋى 7- اقپاندا ءوتتى.
جاقىندا ازەربايجاننىڭ ورتالىق سايلاۋ كوميسسياسى رەسپۋبليكادا وتكەن پرەزيدەنت سايلاۋىنىڭ قورىتىندىسىن شىعاردى، وعان سايكەس يلحام اليەۆ مەملەكەت باسشىسى بولىپ قايتا سايلاندى.
