ازەربايجان تاۋلى قاراباقتا انتيتەررورلىق شارالار باستاعانىن حابارلادى
ازەربايجان رەسپۋبليكاسىنىڭ قورعانىس مينيسترلىگى قاراباق وڭىرىندە جەرگىلىكتى دەڭگەيدە انتيتەررورلىق شارانىڭ جالعاسىپ جاتقانىن مالىمدەدى. ال، ارمەنيانىڭ سىرتقى ىستەر مينيسترلىگى ازەربايجان تاراپىنىڭ ۇستانىمىن ايماقتاعى جاڭا اسكەري شيەلەنىسكە ديپلوماتيالىق دايىندىق رەتىندە باعالادى، دەپ حابارلايدى قازاقپارات ءتىلشىسى.
ازەربايجان تاراپى نە دەيدى؟
ازەربايجان قورعانىس مينيسترلىگىنىڭ مالىمەتى بويىنشا، شارا اياسىندا جوعارى دالدىكتى قارۋ قولدانۋ ارقىلى تەك زاڭدى اسكەري نىساندار مەن اسكەري ينفراقۇرىلىم ىستەن شىعارىلادى.
ازەربايجان رەسپۋبليكاسىنىڭ بيلىگى ارمەنيانىڭ قارۋلى كۇشتەرىنە قاراستى قۇرىلىمدار تۇرعىن الاپتارىنا جاقىن جەردە اتىس قۇرالدارىن جايعاستىرىپ جاتقانىن ايتىپ وتىر. وسىعان بايلانىستى ەلدىڭ قورعانىس مينيسترلىگى ازاماتتىق قاتارداعى جەرگىلىكتى تۇرعىنداردى اسكەري نىسانداردان اۋلاق بولۋعا جانە ارمەنيا قارۋلى كۇشتەرىنىڭ قۇرىلىمدارىن قولداماۋعا شاقىردى.
«مۇنداي اقپارات ازەربايجاننىڭ قاراباق وڭىرىندەگى ارميان تۇرعىندارىنا موبيلدى SMS- سەرۆيس ارقىلى تاراتىلدى. بۇعان قوسا، حالىققا داۋىس زورايتقىش قۇرالدار ارقىلى دا حابار ايتىلىپ، ءۇنپاراقتار تاراتىلىپ جاتىر. اكىمشىلىك، الەۋمەتتىك، ءبىلىم بەرۋ، مەديتسينالىق، ءدىني جانە باسقا نىسانداردا كۇزەت ۇيىمداستىرىلادى. ولاردىڭ ءبارى ازەربايجان زاڭناماسى جانە حالىقارالىق گۋمانيتارلىق قۇقىق نورمالارى بويىنشا قورعاۋعا الىنادى. ايەلدەر مەن بالالارعا، ەگدە ادامدارعا، سونداي- اق مۇگەدەكتىگى بار ادامدار مەن ناۋقاستارعا قاجەتتى مەديتسينالىق كومەك كورسەتىلىپ، اۋىزسۋمەن جانە ازىق- تۇلىكپەن قامتاماسىز ەتىلەدى»، - دەلىنگەن قورعانىس ۆەدومستۆوسىنىڭ مالىمەتىندە.
سونداي- اق، ۆەدومستۆوداعىلار حالىقتى قاۋىپتى اۋماقتاردان ەۆاكۋاتسيالاۋ ءۇشىن لاشىن جولىندا جانە باسقا دا باعىتتاردا گۋمانيتارلىق دالىزدەر مەن قابىلداۋ بەكەتتەرى ۇيىمداستىرىلاتىنىن ايتىپ وتىر.
ارمەنيا نە دەيدى؟
ارمەنيانىڭ سىرتقى ىستەر مينيسترلىگى دە ازەربايجان سىرتقى ىستەر مينيسترلىگىنىڭ ديپلوماتيالىق كورپۋس وكىلدەرى 18- قىركۇيەكتەگى كەزدەسۋدە ايتقان ۇستانىمدارىنا بايلانىستى مالىمدەمە جاسادى.
ارمەنيا سىرتقى ىستەر مينيسترلىگىنىڭ پايىمداۋىنشا، بۇل ۇستانىمدار ايماقتاعى جاڭا اسكەري شيەلەنىسكە، تاۋلى قاراباقتا ەتنيكالىق تازارتۋ جۇرگىزۋدى كوزدەيتىن ناقتى ارەكەتتەرگە ديپلوماتيالىق دايىندىق سياقتى كورىنگەن.
ارمەنيا بيلىگىنىڭ مالىمەتىنشە، ازەربايجان وكىلدەرى ەلدە اككرەديتتەلگەن شەتەلدىك ديپلوماتتارمەن وتكەن كەزدەسۋدە ارمەنيا رەسپۋبليكاسى شيەلەنىستى باسەڭدەتۋگە باعىتتالعان ۇسىنىستاردىڭ ءبارىن قابىلداماعانىن ايتقان. ارمەنيا تارابى ازەربايجاننان ەشبىر رەسمي ۇسىنىس تۇسپەگەنىن العا تارتىپ وتىر.
«ازەربايجان- ارمەنيا شەكاراسىنان اسكەردى اكەتۋ تۋرالى ۇسىنىس كۇشىندە ەكەنىن ايتۋ كەرەك دەپ ەسەپتەيمىز. ارمەنيا رەسپۋبليكاسى وسى باستامانى ىسكە اسىرۋعا قىسقا مەرزىمدە كىرىسۋگە دايىن»، - دەپ مالىمدەدى ارمەنيانىڭ سىرتقى ىستەر مينيسترلىگى.
ارمەنيا سىرتقى ىستەر مينيسترلىگى ازەربايجان تاراپىنىڭ «ارمەنيا تاۋلى قاراباقتا رەجيم ورناتقانى» تۋرالى مالىمەتىن وتىرىك دەپ اتادى.
ولاردىڭ مالىمدەۋىنشە، ارمەنيانىڭ تاۋلى قاراباققا كورسەتىپ جاتقان كومەگى گۋمانيتارلىق سيپاتتا عانا. لاشىن ءدالىزى زاڭسىز بۇعاتتالدى دەپ ەسەپتەيتىن ايماققا وسى سەبەپپەن كومەك قولىن سوزعانىن مالىمدەپ وتىر.
ازەربايجاننىڭ ءدالىزدى بۇعاتتاۋىن زاڭسىز دەپ مالىمدەگەن ارمەنيانىڭ سىرتقى ىستەر مينيسترلىگى تاۋلى قاراباقتا بۇۇ قۇرىلىمدارى مەن وزگە دە حالىقارالىق سەرىكتەستەردىڭ كىرىپ- شىعۋىن قيىنداتىپ، گۋمانيتارلىق داعدارىس تۋىنداتىپ وتىرعانىنا سەنىمدى. لاشىن دالىزىندەگى قوزعالىستان بولەك تاۋلى قاراباققا ازەربايجاننان جەتكىزىلەتىن گاز دا توقتاپ قالعان.
«تاۋلى قاراباقتا ارمەنيا رەسپۋبليكاسىنىڭ ارمياسى جوق. ال، ارمەنيانىڭ ازەربايجان اۋماعىن مينالاعانى تۋرالى جالعان مالىمدەمەلەر حالىقارالىق سوتتىڭ 22-اقپانداعى قاۋلىسىمەن تەرىستەلگەن. ارمەنيا تاراپى كورشى ەلگە قارسى اگرەسسيۆتى ارەكەت جاساۋعا نيەتتى ەمەس ەكەنىن، ال اسكەري رەفورمالار ءوز اۋماعىنىڭ قاۋىپسىزدىگى ءۇشىن قابىلدانىپ جاتقانىن بىرنەشە رەت مالىمدەدى. تاۋلى قاراباقتىڭ اينالاسىنا كەلسەك، باكۋ- ستەپاناكەرت ديالوگىن شيەلەنىستى باسەڭدەتۋ قۇرالى رەتىندە قاراستىرامىز»، - دەلىنگەن ارمەنيا سىرتقى ىستەر مينيسترلىگىنىڭ مالىمدەمەسىندە.
شيەلەنىس شەجىرەسى
قاراباق شيەلەنىسى 1988 -جىلدان بەرى جالعاسىپ كەلەدى. سونىڭ ىشىندە 2 رەت جويقىن قاقتىعىسپەن ەستە قالدى. ءبىرىنشى قاراباق سوعىسى 1992-94 -جىلدارى بولسا، ەكىنشى قاراباق سوعىسى 2020 -جىلى قايتا تۇتانعان.
ارمەنيا دا، ازەربايجان دا تاۋلى قاراباقتى ءوز اۋماعى دەپ سانايدى. احۋال 2022 -جىلى لاشىن دالىزىندەگى قوزعالىس شەكتەلگەن تۇستا قايتا ۋشىققان.
شەتەلدىك ب ا ق- تىڭ مالىمەتى بويىنشا، ەكى سوعىس كەزىندە قوس تاراپتان 32 مىڭداي ادام قايتىس بولعان. مىڭداعان ادام ءىس- ءتۇسسىز جوعالدى دەپ ەسەپتەلەدى.
ەسىمجان ناقتىباي