ازەربايجان مەن ارمەنيا شەكارانى بەلگىلەۋ ءتارتىبىن تالقىلادى

استانا. KAZINFORM - ازەربايجان مەن ارمەنيا شەكاراسىندا ەكى ەلدىڭ ۆيتسە- پرەمەرلەرىنىڭ توراعالىعىمەن مەملەكەتتىك شەكارانى دەليميتاتسيالاۋ جونىندەگى مەملەكەتتىك كوميسسيانىڭ 10-كەزدەسۋى ءوتتى. بۇل تۋرالى اگەنتتىكتىڭ مەنشىكتى ءتىلشىسى حابارلايدى.

كەزدەسۋ بارىسىندا ازەربايجان پرەمەر- ءمينيسترىنىڭ ورىنباسارى شاحين مۇستافايەۆ پەن ارمەنيا پرەمەر-ءمينيسترىنىڭ ورىنباسارى مگەر گريگوريان دەليميتاتسيالىق جۇمىستاردى ودان ءارى جۇرگىزۋ ءۇشىن شەكارا ۋچاسكەلەرىنىڭ كەزەگى ماسەلەلەرىن تالقىلادى.

تاراپتار دەليميتاتسيالىق جۇمىستاردى جۇرگىزۋ ءتارتىبى بويىنشا ءتيىستى نۇسقاۋلىقتاردىڭ جوبالارى بويىنشا پىكىر الماستى.

ازەربايجان مەن ارمەنيانىڭ دەليميتاتسيالىق كوميسسيالارىنىڭ رەگلامەنتى 1-قاراشادا كۇشىنە ەنەتىنى ايتىلدى. ەكىجاقتى كوميسسيانىڭ كەزدەسۋى اياقتالعاننان كەيىن ۆيتسە-پرەمەرلەر كولىك كوممۋنيكاتسيالارى ماسەلەلەرىن بولەك تالقىلادى.

كەلىسسوزدەر قورىتىندىسى بويىنشا ەكى ەل كوميسسياسىنىڭ كەزەكتى وتىرىسىن وتكىزۋ كۇنى مەن ورنىن جۇمىس تارتىبىنە سايكەس بەلگىلەۋ تۋرالى ۋاعدالاستىققا قول جەتكىزىلدى.

25-قازاندا ازەربايجان پرەزيدەنتى يلحام اليەۆ ازەربايجان مەن ارمەنيا اراسىنداعى شەكارانى دەليميتاتسيالاۋ جانە قاۋىپسىزدىك جونىندەگى كوميسسيانىڭ بىرلەسكەن قىزمەتى تۋرالى ەرەجەنى بەكىتۋ تۋرالى جارلىققا قول قويدى.

24-قازاندا ارمەنيا پرەزيدەنتى ۆااگن حاچاتۋريان ارميان- ازەربايجان شەكاراسىن دەليميتاتسيالاۋ ەرەجەسىن راتيفيكاتسيالاۋ تۋرالى زاڭعا قول قويدى. 23-قازاندا ارمەنيا پارلامەنتى جوعارىدا اتالعان ەرەجەنى ءبىرىنشى وقىلىمدا ماقۇلداعان ەدى.

ەسكە سالا كەتسەك، بيىل 19-ساۋىردە ارمەنيا رەسپۋبليكاسى مەن ازەربايجان رەسپۋبليكاسى اراسىنداعى شەكارانى دەليميتاتسيالاۋ ماسەلەلەرى بويىنشا ەلدەر كوميسسيالارىنىڭ سەگىزىنشى وتىرىسى ءوتتى. 23-ساۋىردە ارمەنيا مەن ازەربايجان شەكاراسىندا العاشقى شەكارا باعانى ورناتىلعان ەدى.