ازەربايجان كاسپي تەڭىزىندە جاساندى ارالدار سالادى
استانا. KAZINFORM - ازەربايجان ۇكىمەتى كاسپي تەڭىزىندە جاساندى جەر ۋچاسكەلەرىن قۇرۋ ءۇشىن ينۆەستورلار تارتۋدى كوزدەپ وتىر. بۇل تۋرالى پارلامەنت وتىرىسىندا مەملەكەتتىك قالا قۇرىلىسى جانە ساۋلەت كوميتەتىنىڭ باسشىسى راشاد يسمايلوۆ ءمالىم ەتتى.
«بۇل جەرلەر كاسپي تەڭىزىنىڭ ازەربايجاندىق سەكتورىنىڭ سولتۇستىگىندە، وڭتۇستىك جاعالاۋىندا قۇرىلادى، ولار باكۋدىڭ باس جوسپارىندا ەسكەرىلمەگەن»، - دەدى ول پارلامەنتتىڭ ەكونوميكالىق ساياسات، ونەركاسىپ جانە كاسىپكەرلىك كوميتەتىنىڭ «كاسپي تەڭىزىنىڭ ازەربايجان سەكتورىنداعى جاساندى جەر ۋچاسكەلەرىن قۇرۋ تۋرالى» تاقىرىبىندا وتكەن وتىرىسىندا.
ونىڭ ايتۋىنشا، زاڭ جوباسىندا جاساندى جەر ۋچاسكەلەرىن قۇرۋدىڭ ەرەكشەلىكتەرى كورسەتىلگەن.
«قۇرىلىس جوبالارى قالا قۇرىلىسى كودەكسىنە سايكەس ازىرلەنەتىن بولادى. بۇل رەتتە ولاردىڭ ەكولوگيالىق جانە باسقا دا سالدارى ەسكەرىلەدى»، - دەپ قوستى اپپارات باسشىسى.
بۇعان دەيىن جەرگىلىكتى باق بۇل زاڭ جوباسىنىڭ ازەربايجان پارلامەنتىنە جىبەرىلگەنىن، جاقىن ارادا تالقىلاۋعا شىعارىلاتىنىن حابارلاعان بولاتىن. زاڭ جوباسى تەك باكۋگە عانا قاتىستى ەمەس. جاساندى ارالدار نابران، ليانكياران جانە باسقا جەرلەردە دە سالىنۋى مۇمكىن.
كۇزدە كاسپي تەڭىزىندە جاساندى ارالدار قۇرۋ بويىنشا جوبالاۋ جۇمىستارى باستالادى دەپ بولجانعان. ولار بولاشاقتا ەل استاناسى باكۋ مەن جاساندى جەر ۋچاسكەلەرى اراسىندا اۆتوموبيل جولدارىن سالۋدى، سونداي-اق وسى ارالدارعا پاروم جانە كەمە قاتىناسىن اشۋدى كوزدەيدى.
