گازدى شەكتەن تىس تۇتىناتىندارعا تاريف قالاي قىمباتتايدى

استانا. KAZINFORM - ماجىلىستەگى گازبەن جابدىقتاۋ جانە تاۋارلىق گازدى ۇنەمدى تۇتىنۋ ماسەلەلەرىنە ارنالعان زاڭ جوباسىنىڭ تانىستىرىلىمىندا كوگىلدىر وتىندى شەكتەن تىس مولشەردە تۇتىناتىندارعا جوعارى تاريف تاعايىنداۋ ۇسىنىلدى.

زاڭ جوباسىن تانىستىرعان دەپۋتات ەكاتەرينا سمىشليايەۆا گاز تۇتىنۋدىڭ بىرنەشە ساتىلى ليميتى بەلگىلەنەتىنىن ايتتى. سونىڭ ىشىندە ۇنەمدى تۇتىنۋ ءتاسىلى تۇرمىستىق گاز تۇتىناتىن 2,2 ميلليون ابونەنتكە قولدانىلۋى مۇمكىن. ولار جىل سايىن 4,4 ميلليارد تەكشە مەتر گاز تۇتىنىپ وتىر.

اتالعان سانات وكىلدەرى گاز تۇتىنۋدىڭ نورماسىنان ارتىق مولشەردە كوگىلدىر وتىن جاقسا، قالىپتى تاريفتىڭ 1,3 نەمەسە 1,5 كوەففيتسەنتىن تولەيدى. ال تۇرمىستىق گاز تۇتىنۋ مولشەرى وڭىرلەردىڭ كليماتىنا بايلانىستى بولماق. مىسالى، قىسى قاتتى وڭىرلەردە جىلىتۋ ماۋسىمى كەزىندە ايىنا 920 تەكشە مەتر، قىسى جەڭىل وتەتىن وڭىرلەردە ايىنا 625 تەكشە مەتر ەتىپ بەكىتۋ ۇسىنىلىپ وتىر. ال جىلىتۋ ماۋسىمىنان باسقا كەزەڭدە ايىنا بارلىق وڭىرلەردە 70 تەكشە مەتر بولماق.

ب ا ق وكىلدەرىنە بەرگەن سۇحباتىندا دەپۋتات بۇل ساياسات تۇرمىستىق گاز تۇتىنۋ تاريفىن جاپپاي كوتەرۋدى كوزدەمەيتىنىن ءتۇسىندىردى.

ەنەرگەتيكا مينيسترلىگى گاز ونەركاسىبى دەپارتامەنتى گازداندىرۋ باسقارماسىنىڭ باسشىسى ىزىمبەرگەن بەرەكە دە وسىلاي دەپ وتىر.

«پرەزيدەنت بىلتىر ناۋرىز ايىنداعى پارلامەنتتىڭ كەڭەيتىلگەن وتىرىسىندا اۋدانى 400-500 شارشى مەتر بولاتىن ۇلكەن ۇيلەردىڭ يەلەرى 100-200 شارشى مەترلىك ۇيلەرمەن بىردەي گاز تاريفىن تولەمەۋ كەرەكتىگىن ايتقان. وسىعان وراي تۇتىنۋ نورماسىن ەسەپتەپ جاتىرمىز. ول نورما ءار وڭىردە ءار ءتۇرلى بولادى. مىسالى، ماڭعىستاۋدا جىلى، قوستانايدا سالقىن دەگەن سياقتى. كوەففيتسەنت ءالى بەلگىلەنگەن جوق. ماڭعىستاۋ وبلىسىندا ءاربىر ءۇي ايىنا شامامەن 600-700 تەكشە مەتر گاز تۇتىنادى. ال قوستاناي وبلىسىندا كليمات سالقىن بولعانىنا قاراماستان، ماڭعىستاۋمەن بىردەي مولشەردە تۇتىنادى. ماڭعىستاۋلىقتاردىڭ كوپ تۇتىناتىنى، تاريف ءبىرشاما تومەن. ياعني، ءتيىمدى تۇتىنۋ تەندەنتسياسىن كورمەي وتىرمىز. گاز سارقىلاتىن رەسۋرس بولعاندىقتان ۇنەمدى تاريف ەنگىزبەكشىمىز. ءبىراق قازىرگە ناقتى قانداي مولشەر شەگى قويىلاتىنى، قانداي كوەففيتسەنتتەر قولدانىلاتىنى ءالى ناقتى ەمەس. ونىڭ ءارقايسىسى قوعامدا اشىق تالقىلاۋ ارقىلى بەلگىلەنەدى»، - دەيدى مينيسترلىك مامانى.