نازاربايەۆتار وتباسىمەن قۇداندالى بولعان ەكس-پرەمەر تۇرمەدەن شىعادى

ساياساتكەردىڭ قازاقستانمەن دە بايلانىسى بار. ونىڭ قىزى بولات نازاربايەۆتىڭ بۇرىنعى ايەلىنىڭ ۇلىنا تۇرمىسقا شىققان. مالايزيا سوتى ونى ءۇي قاماققا اۋىستىرۋ تۋرالى شەشىم قابىلدادى، دەپ حابارلايدى Ulysmedia.kz.

ءمان-جايى

نادجيب رازاك 2009-2018-جىلدارى مالايزيا ۇكىمەتىن باسقاردى. ول پرەمەر-مينيستر بولعان تۇستا 1MDB مەملەكەتتىك ينۆەستيتسيالىق قورى قۇرىلدى. كەيىن بۇل قور ەلدەگى ەڭ ءىرى جەمقورلىق داۋلارىنىڭ بىرىنە اينالدى.

قور ينۆەستيتسيا تارتۋ جانە ەكونوميكانى دامىتۋعا قارجى ءبولۋ ماقساتىندا قۇرىلعان. الايدا ودان 4,5 ميلليارد دوللارعا دەيىن قاراجات شىعارىلعان. مالايزيا پروكۋراتۋراسىنىڭ مالىمەتىنشە، ءبىر ميلليارد دوللاردان استام اقشا رازاكتىڭ وزىمەن بايلانىستى شوتتارعا تۇسكەن.

پرەمەر-مينيستر قىزمەتىنەن كەتكەننەن كەيىن ساياساتكەر تەرگەۋگە الىندى. سوت ونى جەمقورلىق پەن قارجىلىق الاياقتىققا قاتىستى بىرنەشە ەپيزود بويىنشا كىنالى دەپ تانىدى.

2025-جىلعى جەلتوقساندا ىستەردىڭ ءبىرى بويىنشا ول 15 جىلعا باس بوستاندىعىنان ايىرىلىپ، جالپى سوماسى 2,8 ميلليارد دوللار بولاتىن ايىپپۇل تولەۋگە مىندەتتەلدى.

رازاك تاعىلعان ايىپتى مويىندامايدى. ول ءوزىن اۋقىمدى قارجىلىق الاياقتىقتىڭ قۇربانى بولعانىن ايتىپ، سوت ۇكىمىنە شاعىم ءتۇسىردى.

كورول ءۇي قاماققا اۋىستىرۋعا رۇقسات بەردى

وقيعاعا كورولدىڭ كەشىرىم جاساۋى جاڭا وزگەرىس اكەلدى. وسى شەشىمنەن كەيىن بۇرىنعى پرەمەر تۇرمەدەن ءۇي قاماققا اۋىسۋعا مۇمكىندىك الدى.

باستاپقىدا رازاك 6-قاراشادا ۇيىنە جىبەرىلۋى كەرەك ەدى. سول ۋاقىتقا دەيىن كەشىرىم شارتتارىندا كورسەتىلگەن ايىپپۇل دا تولەنگەن ەدى.

الايدا سوڭعى ساتتە مالايزيانىڭ باس پروكۋرورى ارالاسىپ، ونى ءۇي قاماققا اۋىستىرۋدى توقتاتتى. ول كورول شەشىمى مەن سوت قاۋلىسىن زاڭ تۇرعىسىنان تۇسىندىرۋگە قاتىستى سۇراقتار بار ەكەنىن العا تارتتى.

كەلەسى كۇنى كورول سۇلتان يبراگيم بۇل جاعدايعا بايلانىستى ەسكەرتۋ جاسادى. ونىڭ ايتۋىنشا، جارلىعى انىق بولعان جانە ونى ەكىۇشتى تۇسىندىرۋگە نەگىز جوق. سونداي-اق كورول ءوز شەشىمىنە قارسى شىعۋ ونىڭ بيلىگىنە باعىنباۋ رەتىندە باعالانۋى مۇمكىن ەكەنىن ەسكەرتتى.

10-قاراشادا مالايزيانىڭ جوعارعى سوتى رازاكتى دەرەۋ ءۇي قاماققا اۋىستىرۋعا رۇقسات بەردى. بۇل تۋرالى مەملەكەتتىك Bernama اگەنتتىگى حابارلادى.

رازاكتىڭ نازاربايەۆتار وتباسىنا قانداي قاتىسى بار؟

بۇل وقيعانىڭ قازاقستانعا دا قاتىسى بار. 2015-جىلى مالايزيانىڭ بۇرىنعى پرەمەر-ءمينيسترىنىڭ قىزى نۋريانا نادجۆا دانيار كەسىكبايەۆقا تۇرمىسقا شىقتى. ول ب ا ق- تا دانيار نازاربايەۆ دەگەن اتپەن دە اتالعان.

دانياردىڭ اناسى مايرا كەسىكبايەۆا بۇعان دەيىن قازاقستاننىڭ تۇڭعىش پرەزيدەنتى نۇرسۇلتان نازاربايەۆتىڭ ءىنىسى بولات نازاربايەۆپەن نەكەدە بولعان.