ازاماتتىق قورعاۋ اكادەمياسىنداعى وقيعا: 3 وقىتۋشى، 3 كۋرسانت سوتتالدى

استانا. KAZINFORM - توتەنشە جاعدايلار مينيسترلىگى ازاماتتىق قورعاۋ اكادەمياسىندا بولعان پارا بەرۋ وقيعاسىنا قاتىستى 6 ادام سوتتالدى. بۇل تۋرالى ق ر سىبايلاس جەمقورلىققا قارسى ءىس-قيمىل اگەنتتىگىنىڭ رەسمي وكىلى دانيار بيگايداروۆ ايتتى.

— اقمولا وبلىسىنىڭ كامەلەتكە تولماعاندار ىستەرى جونىندەگى سوتى جەمقورلىق قىلمىستىق قۇقىق بۇزۋشىلىقتارى ءۇشىن توتەنشە جاعدايلار مينيسترلىگى ازاماتتىق قورعاۋ اكادەمياسىنىڭ وقىتۋشىسى گ. حاسانوۆا، ساپتىق بولىمشە كومانديرلەرى ي. ەرنازار، ر. شايكەنوۆ، سونداي-اق كۋرسانتتار ب. سەيتەباي، ا. امانباي جانە ا. ەركىندەردى سوتتادى. ۇكىم وقۋ ورنىندا بارلىق جەكە قۇرامنىڭ الدىندا جاريالاندى. حاسانوۆا پارا العانى ءۇشىن، ال وقۋشىلار جالپى ءبىلىم بەرۋ ءپانى بويىنشا ارالىق باقىلاۋدان وتۋگە پارا بەرگەنى ءۇشىن كىنالى دەپ تانىلدى، - دەدى ول.

ءمالىم بولعانداي، وقۋ ۆزۆودتارىنىڭ كومانديرلەرى ەرنازار مەن شايكەنوۆ كۋرسانتتارعا سەرجانت اتاعىن الىپ بەرەم دەگەن جەلەۋمەن ولاردىڭ اقشالاي قاراجاتىن يەمدەنگەن.

ەرنازار رەسەي ت ج م اكادەمياسىنا وقۋعا تۇسۋگە جاردەمدەسۋ سىلتاۋىمەن تالاپكەردىڭ اتا-اناسىنان سوماسى 2,5 ميلليون تەڭگە اقشالاي قاراجات العان.

سوت ۇكىمىمەن ەرنازار 3 جىل 6 ايعا باس بوستاندىعىنان ايىرىلدى، حاسانوۆا، شايكەنوۆ جانە باسقالارعا ايىپپۇل تۇرىندە جازا تاعايىندالىپ، ءومىر بويى مەملەكەتتىك قىزمەتتە جانە كۆازيمەملەكەتتىك سەكتور سۋبەكتىلەرىندە قىزمەت اتقارۋ قۇقىعىنان ايىرىلدى.

سونىمەن قاتار، سوتتالعاندار: حاسانوۆ - پولكوۆنيك، ەرنازار - كاپيتان جانە شايكەنوۆ - ازاماتتىق قورعاۋ اعا لەيتەنانتى ارنايى اتاقتارىنان ايىرىلدى.

سوت اكتىسى زاڭدى كۇشىنە ەنگەن جوق.

ايتا كەتەيىك، استانادا پارا الىپ، بالاباقشا ورنىن ساۋداعا سالعان شەنەۋنىك ۇستالدى.

سپورتتى دامىتۋ ديرەكسياسىنىڭ باسشىسى 584 ميلليون تەڭگە قارجى جىمقىرعانى انىقتالدى.

«كاسپي» ف ك باسشىسى ءدىني اعىم وكىلدەرىمەن بىرلەسە اقشا بوپسالاعانى بەلگىلى بولدى.