ازاماتتىق قوعام دەموكراتيانى دامىتۋدا شەشۋشى ءرول اتقارادى - بيبىگۇل جەكسەنباي

  ق ر پارلامەنتى سەناتىنىڭ دەپۋتاتى بيبىگۇل جەكسەنباي ەلىمىزدە ازاماتتىق قوعام قالاي دامىپ جاتقانىن ايتتى، دەپ حابارلايدى Kazinform.

«ازاماتتىق قوعامنىڭ بەلسەندىلىگى - ادامي كاپيتالدىڭ، ەكونوميكالىق قۇندىلىقتاردىڭ ەل يگىلىگىنىڭ نەگىزى. ازاماتتىق قوعام مەن پارلامەنتتىڭ ءوزارا ءىس- قيمىلى دەموكراتيانى دامىتۋدا شەشۋشى ءرول اتقارادى. كوپتەگەن ەلدەردە ازاماتتىق قوعام سونىڭ ىشىندە ۇكىمەتتىك ەمەس ۇيىمدار، قوعام بەلسەندىلەرى ساراپشىلار زاڭ شىعارۋ پروتسەسىنە بەلسەنە قاتىسادى. ءبىزدىڭ ەلىمىزدە دە العاشقى قادام جاسالىپ جاتىر. پارلامەنت دەپۋتاتتارىنىڭ توپتارىندا جوعارىدا اتالعاندار بەلسەندى جۇمىس ىستەپ ءجۇر»، - دەدى بيبىگۇل جەكسەنباي «ازاماتتىق قوعام مەن پارلامەنتشىلەردىڭ زاڭ شىعارۋ سالاسىنداعى ىنتىماقتاستىق فورماتتارى تۋرالى ديالوگى» اتتى دوڭگەلەك ۇستەلدە.

سەناتوردىڭ ايتۋىنشا، ازاماتتىق قوعام پارلامەنت جۇمىسىنا قولداۋ كورسەتىپ كەلەدى.

«مۇنداي ءوزارا ارەكەتتەستىك قوعامنىڭ مۇددەسىن كورسەتەتىپ قانا قويماي، ونىڭ دامۋىنا اسەر ەتەدى جانە ءتيىمدى زاڭناما جاساۋعا مۇمكىندىك بەرەدى. ازاماتتىق قوعام ەشقاشان بىردەن ورناماعان. ءبىز توتاليتارلىق قوعامنان نارىقتىق قوعامعا وتتىك»، - دەيدى حالىق قالاۋلىسى.

ەلوردادا «ازاماتتىق قوعام مەن پارلامەنتشىلەردىڭ زاڭ شىعارۋ سالاسىنداعى ىنتىماقتاستىق فورماتتارى تۋرالى ديالوگى» اتتى دوڭگەلەك ۇستەل ءوتىپ جاتىر.