وزبەكستاندا حالىق سانى كۇن سايىن 2,1 مىڭ ادامعا ارتىپ كەلەدى - شەتەلدەگى قازاق باسپا ءسوزى
Kazinform ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
تۇركيانىڭ تۇڭعىش عارىشكەرى عارىشتا اتاتۇرىكتىڭ ءسوزىن ەسكە الدى - TRT
فلوريداداعى عارىش ورتالىعىنان تۇركيانىڭ تۇڭعىش عارىشكەرى الپەر گەزەراۆجىنىڭ عارىش ساپارى باستالدى.
«SpaceX» عارىش كەمەسى، سونىڭ ىشىندە تۇركيانىڭ تۇڭعىش عارىشكەرى الپەر گەزەراۆجى امەريكا قۇراما شتاتتارىنىڭ (ا ق ش) فلوريداداعى كەننەدي عارىش ورتالىعىنداعى 39A ۇشىرۋ كەشەنىنەن جەرگىلىكتى ۋاقىت بويىنشا ساعات 16.49-دا (تۇركيا ۋاقىتىمەن ساعات 00.49) ءساتتى ۇشىرىلدى.
بۇل تۋرالى تۇركيا راديو تەلەۆيزيا پورتالى حابارلادى.
عارىش كولىگى سەنبى كۇنى تۇركيا ۋاقىتىمەن ساعات 13.15-تە حالىقارالىق عارىش ستانسياسىنا (ح ع س) جەتەدى دەپ جوسپارلانعان بولاتىن.
«TRT»-نىڭ مالىمەتىنشە، «SpaceX» ءوزىنىڭ «X» جەلىسىندەگى اككاۋنتىندا حالىقارالىق عارىش ستانسياسىنا ساپارىن باستاعان «Dragon» كاپسۋلاسىنداعى «Ax-3» كومانداسىنىڭ العاشقى سەزىمدەرىن تىكەلەي ەفيردە كورسەتتى.
گەزەراۆجى عارىشتاعى العاشقى سوزىندە، «مەن تۇركيانىڭ عارىشتىق ميسسياسى ءۇشىن تۇڭعىش تۇرىك عارىشقا قادام باسقان كەزدە ۇلى اتاتۇرىكتىڭ سوزدەرىمەن باستاعىم كەلەدى. تۇركيا رەسپۋبليكاسىنىڭ نەگىزىن قالاۋشى مۇستافا كەمال اتاتۇرىكتىڭ دانا ءسوزى: «بولاشاق اسپاندا»، دەدى.
ايتا كەتۋ كەرەك، وسى ساپار ارقىلى «تۇركيانىڭ تۇڭعىش عارىشكەرى» اتاعىن دا العان گەزەراۆجى ح ع س-تە 14 كۇن بويى 13 ءتۇرلى عىلىمي تاجىريبە جاساۋ جوسپارلانۋدا.
التايعا قىسقى سپورت تۇرىنەن ءتورت ەلدىڭ سپورتشىلارى جينالدى - «حالىق گازەتى»
شينجاڭنىڭ التاي قالاسىنداعى گەنارال تاۋ حالىقارالىق تاۋ شاڭعىسى كۋرورتىندا «قار- مۇز جىبەك جولى، قىتاي قار مەكەنى» اتتى التاي تاۋىندا العاشقى قىسقى سپورتتىق ويىندار اشىلدى. سپورتتىق شاراعا قىتاي، قازاقستان، موڭعوليا جانە رەسەيدەن 155 سپورتشى قاتىستى، دەپ حابارلايدى قىتايدىڭ «حالىق گازەتى».
اتالعان باسىلىمنىڭ دەرەگىنشە، وسى ءىس-شارا بارىسىندا كونكيمەن جۇگىرۋ، شورت-ترەك، مانەرلەپ سىرعاناۋ، شاڭعى جارىسى، تاۋ شاڭعىسى، سنوۋبورد، الپينيزم شاڭعى جارىسى (ەجەلگى تەرى شاڭعىمەن سىرعاناۋ) جانە باسقا دا جارىس تۇرلەرى وتكىزىلەدى.
ايتا كەتۋ كەرەك، التاي ايماعى سولتۇستىكتىڭ 45-47 گرادۋسىنداعى التىن ەندىكتە ورنالاسقان. بۇل قىتايداعى ەڭ جاقسى تابيعي شاڭعى ايماقتارىنىڭ ءبىرى ءارى تاۋ شاڭعىسى مەن كروسس سپورتشىلارى ءۇشىن ماڭىزدى جاتتىعۋ بازالارىنىڭ ءبىرى. مۇنداعى قار-مۇز جارىستارىنىڭ ارتىقشىلىعى بارعان سايىن ايقىندالۋدا.
موڭعوليا حالقىنىڭ سانى 3,5 ميلليونعا جەتتى - «Kaznews»
ەلدىڭ ۇلتتىق ستاتيستيكا كوميتەتى بۇعان دەيىن 22-قاراشاعا قاراي موڭعوليا حالقىنىڭ جالپى سانى 3,5 ميلليون ادامعا جەتەتىنىن حابارلاعان.
«اتالعان كوميتەتتىڭ بۇل بولجامى سوڭعى ءۇش جىلداعى تۋۋ، ءولىم جانە حالىقتىڭ تابيعي قوزعالىسىنا نەگىزدەلگەن»، - دەيدى موڭعوليا ۇلتتىق ستاتيستيكا كوميتەتىنىڭ حالىق ساناعى جانە تۇرعىن ءۇي قورى ءبولىمىنىڭ ستاتيسى.
بۇل تۋرالى موڭعوليالىق Kaznews اقپاراتتىق پورتالى حابارلادى.
«سوڭعى ءۇش جىلدا ورتا ەسەپپەن ءار جەتى مينۋت 16 سەكۋند سايىن ءبىر بالا دۇنيەگە كەلىپ، 27 مينۋت 46 سەكۋند سايىن ءبىر ادام قايتىس بولادى، ال موڭعوليا حالقىنىڭ سانى ءار توعىز مينۋت 55 سەكۋند سايىن ءبىر ادامعا ارتىپ كەلەدى ەكەن» دەپ جازادى موڭعوليالىق باسىلىم.
Kaznews دەرەگىنشە، 1962 -جىلى موڭعوليا حالقىنىڭ سانى 1 ميلليون بولسا، 1988 -جىلى ەل ەكى ميلليون، 2015 -جىلى ءۇش ميلليونعا جەتتى.
2033 -جىلى 4 ميلليونعا، 2048 -جىلى 5 ميلليونعا جەتەدى دەگەن بولجام بار.
استانا پروتسەسىنىڭ جاڭا راۋندى وتەدى - Parstoday
سيريا بەيبىت كەلىسسوزدەرى استانا پروتسەسى اياسىندا كەپىلگەر ەلدەر وكىلدەرىنىڭ وتىنىشىنەن كەيىن 24-25-قاڭتار ارالىعىندا قازاقستاننىڭ استاناسىندا وتەدى.
بۇل تۋرالى وسى اپتادا يراننىڭ «Parstoday» اقپارات اگەنتتىگى دە حابارلادى.
وتكەن جىلى قازاقستاننىڭ سىرتقى ىستەر مينيسترلىگى استانا كەلىسسوزدەرىنىڭ 20-شى راۋندىن سوڭعى كەزدەسۋ رەتىندە جاريالاعانىنا قاراماستان، بۇل پروتسەستى جالعاستىرۋ تۋرالى شەشىم قابىلداندى.
يراندىق باسىلىمنىڭ بۇل اقپاراتى ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆتىڭ مالىمدەمەسىنە نەگىزدەلگەن.
«كەپىلگەر ەلدەردىڭ ۇجىمدىق ءوتىنىشى نەگىزىندە 2024 -جىلدىڭ 24-25 قاڭتارىندا استانا پروتسەسى اياسىندا 21-شى سيريا حالىقارالىق كەزدەسۋى وتەدى»، - دەگەن ق ر سىرتقى ىستەر مينيسترلىگىنىڭ رەسمي وكىلى.
سونىمەن قاتار وسى اپتادا «Parstoday»-دە «يراننىڭ مۇناي تابىسى 34 ميلليارد دوللارعا جەتتى» دەگەن تاقىرىپتاعى اقپارات جارىق كوردى.
ا ق ح ا (اتوم قۋاتى حالىقارالىق اگەنتتىگى) يراننىڭ 2023 -جىلدىڭ 9 ايىندا مۇناي تابىسىنىڭ 34 ميلليارد دوللار بولعانىن جاريالادى.
يراندىق اقپارات اگەنتتىگىنىڭ مالىمەتى بويىنشا، ا ق ح ا ءوز ەسەبىندە يراننىڭ 2023 -جىلدىڭ العاشقى توعىز ايىندا مۇنايدان تۇسكەن جالپى كىرىسىن 33 ميلليارد 900 ميلليون دوللار دەپ باعالاعان.
2023 -جىلدىڭ قاڭتار-قىركۇيەك ايلارىنداعى يراننىڭ مۇناي تابىسى و پ ە ك-تىڭ وسى كەزەڭدەگى جالپى كىرىسىنىڭ %12 ىنا تەڭ بولدى.
يراننىڭ 2023 -جىلدىڭ 9 ايىندا مۇناي ساتۋدان تۇسكەن 34 ميلليارد دوللارلىق مۇناي تابىسى 2020 -جىلدىڭ 12 ايىندا يراننىڭ مۇناي تابىسىنان ەكى ەسە كوپ بولدى.
2022 -جىلى يراننىڭ مۇناي ساتۋدان تۇسكەن جالپى تابىسى 54 ميلليارد دوللارعا جەتكەن ەكەن.
ا ق ح ا و پ ە ك-كە مۇشە 13 ەلدىڭ 2023 -جىلدىڭ 9 ايىندا مۇنايدان تۇسكەن جالپى كىرىسىن 281 ميلليارد 200 ميلليون دوللارعا ەسەپتەدى.
وزبەكستاندا حالىق سانى كۇن سايىن ورتا ەسەپپەن 2,1 مىڭ ادامعا ارتىپ كەلەدى - «ءوز ا»
وزبەكستان حالقى 2023 -جىلدىڭ ءار ايىندا ورتا ەسەپپەن 64600 ادامعا كوبەيگەن. ستاتيستيكا اگەنتتىگىنىڭ مالىمەتتەرىنە سايكەس، 2024 -جىلدىڭ 1-قاڭتارىندا وزبەكستاننىڭ تۇراقتى تۇرعىندارىنىڭ سانى 36799756 ادامدى قۇرادى.
رەسپۋبليكادا حالىق سانى وتكەن جىلدىڭ سايكەس كەزەڭىمەن سالىستىرعاندا 2,2 پايىزعا ارتقان. بۇل تۋرالى وزبەكستاندىق «ءوز ا» اقپاراتتىق اگەنتتىگى حابارلادى.
وزبەكستاندىق ب ا ق-تىڭ دەرەگىنشە، 2023 -جىل كۇن سايىن تۇراقتى تۇرعىندارىنىڭ سانى ورتا ەسەپپەن 2,1 مىڭ ادامعا كوبەيگەن.
سونداي-اق، «ءوز ا» اقپاراتتىق اگەنتتىگىندە «تاشكەنت وبلىسىندا درون شوۋى ۇيىمداستىرىلدى» دەگەن تاقىرىپتاعى اقپارات جارىق كوردى.
دەمالىس كۇندەرى ۇيىمداستىرىلعان ءتۇرلى-ءتۇستى درون شوۋى تاشكەنت وبلىسى «يانگيۋل» قالاسىنىڭ تۇرعىندارىنا كوتەرىڭكى كوڭىل-كۇي سىيلاعان.
قالا اكىمدىگى سەرىكتەس ۇيىمدارمەن بىرلەسىپ ۇيىمداستىرىلعان شارادا 400 درون ۇشىرىلعان. ولاردىڭ كومەگىمەن وزبەكستان تاۋەلسىزدىگىنىڭ رامىزدەرى، قىسقى كورىنىستەر، جاڭا جىل مەرەكەسىنە بايلانىستى سۋرەتتەر ءتۇرلى تۇستە بەينەلەندى.
وزبەكستاندىق باسىلىمنىڭ دەرەگىنشە، شارا بارىسىندا قاۋىپسىزدىككە ەرەكشە نازار اۋدارىلدى. وسى شوۋدى تاماشالاۋعا جەرگىلىكتى قاۋىم وكىلدەرى مەن جاستار، قالا قوناقتارى كەلگەن.
سونىمەن قاتار، وسى اپتادا «ءوز ا»-دا «تۇركى ەلدەرىنىڭ جەڭىل اتلەتيكا قاۋىمداستىعى» قۇرىلادى» دەگەن تاقىرىپتاعى اقپارات جاريالاندى.
اتالعان ب ا ق-تىڭ مالىمەتىنشە، جەڭىل اتلەتيكادان حالىقارالىق سپورت ۇيىمدارىنىڭ سانى تاعى بىرەۋگە ارتادى دەپ كۇتىلۋدە.
بۇگىندە تۇركيا رەسپۋبليكاسىنىڭ باستاماسىمەن تۇركى مەملەكەتتەرى ۇيىمى اياسىندا «تۇركى جەڭىل اتلەتيكا قاۋىمداستىعىن» قۇرۋ جۇمىستارى جۇرگىزىلۋدە.
«بۇل شارالار ءساتتى اياقتالسا، جەڭىل اتلەتيكادان تاعى ءبىر حالىقارالىق سپورت ۇيىمى - «تۇركى مەملەكەتتەرىنىڭ جەڭىل اتلەتيكا قاۋىمداستىعى» ءوز قىزمەتىن باستايدى. دەمەك، جەڭىل اتلەتيكادان جارىستار مەن چەمپيوناتتار كوبەيىپ، جاستاردىڭ وسى سپورت تۇرىمەن اينالىسۋ اياسى كەڭەيەدى»، دەپ جازادى Uza.
قىتايدا 2023 -جىلعى كولىك ءوندىرىسى مەن ولاردىڭ ساتىلىمى 30 ميلليوننان استى - CNR
قىتايدىڭ اۆتوموبيل ونەركاسىبى قاۋىمداستىعىنىڭ جاريالاعان مالىمەتىنشە، 2023 -جىلى ەلدە اۆتوموبيلدەر ءوندىرىسى مەن ساتىلىمى سايكەسىنشە 30,161 ميلليون جانە 30,094 ميلليونعا جەتىپ، تيىسىنشە 11,6 پايىز جانە 12 پايىزعا وسكەن.
ءبىر جىلداعى ءوندىرىس پەن ساتىلىم بويىنشا رەكوردتىق دەڭگەيگە جەتكەن، دەپ حابارلايدى قىتايدىڭ «ورتالىق حالىق راديوسى».
ولاردىڭ ىشىندە جاڭا ەنەرگەتيكالىق كولىك قۇرالدارىن ءوندىرۋ جانە ساتۋ 9,587 ميلليون جانە 9,495 ميلليونعا جەتىپ، تيىسىنشە 35,8 پايىزعا جانە 37,9 پايىزعا ۇلعايدى، ال نارىق ۇلەسى 31,6 پايىزعا جەتكەن.
قىتايلىق ب ا ق-تىڭ كەلتىرگەن مالىمەتىنە سۇيەنسەك، قازىر ەلەكتروموبيلدەر قىتاي اۆتوكولىك ونەركاسىبىنىڭ ماڭىزدى بولىگىنە اينالىپ، ەكسپورت بويىنشا جوعارى كورسەتكىشكە قول جەتكىزگەن. 2023 -جىلدىڭ سوڭىندا، قىتايدىڭ ءوز ماركاسى بيۆايدي (BYD) دۇنيەجۇزىندەگى ەڭ ۇلكەن ەلەكترلىك كولىكتەر جاسايتىن كاسىپورىنعا اينالدى.
بولاشاقتا قىتاي دۇنيەجۇزىندە ەڭ كوپ كولىك ەكسپورتتايتىن ەلگە اينالۋدى ماقسات ەتىپ وتىر.
اۆتور
بەيسەن سۇلتان ۇلى
