ازامات ساتىبالدى ەرەكشە ماراپاتقا يە بولدى
استانا. قازاقپارات - ورتالىق ازيا ەلدەرى تەاترلارىنىڭ IX حالىقارالىق فەستيۆالىندە ءبىرقاتار قازاقستاندىق تەاتر ءارتىسى ماراپاتتالدى. بۇل جايلى م. اۋەزوۆ اتىنداعى قازاق ۇلتتىق دراما تەاترى حابارلادى.
قازاقستاننىڭ ەڭبەك سىڭىرگەن قايراتكەرى ازامات ساتىبالدى جاڭا ماراپات الدى.
«تۇركى دۇنيەسىنىڭ تەاتر ونەرىنە قوسقان ۇلەسى ءۇشىن توسبەلگىسىمەن مۇحتار اۋەزوۆ اتىنداعى قازاق ۇلتتىق دراما تەاترىنىڭ ءارتيسى، قازاقستاننىڭ ەڭبەك سىڭىرگەن قايراتكەرى - ازامات ساتىبالدى ماراپاتتالدى. م. اۋەزوۆ اتىنداعى قازاق ۇلتتىق دراما تەاترىنىڭ ۇجىمى ماراپات يەسىن شىن جۇرەكتەن قۇتتىقتايدى! تەاتر كەڭىستىگى مەن ەل مادەنيەتى ءۇشىن اتقارىپ جۇرگەن ەڭبەگىڭىزدىڭ ءاردايىم جەمىستى بولۋىن تىلەيدى»، - دەلىنگەن حابارلامادا.
سونداي-اق تۇركى دۇنيەسىنىڭ تەاتر ونەرىنە قوسقان ۇلەسى ءۇشىن توسبەلگىسىمەن سالتانات باقايەۆا، عاني عالىم ۇلى، ەلىك نۇرسۇلتان ماراپاتتالدى.
ەسكە سالايىق، «قازاق فيلم» كينوستۋدياسىندا داۋ شىعىپ، كەيىن ازامات ساتىبالدى قىزمەتىنەن كەتتى.
