AZAL ۇشاعىنىڭ گيدراۆليكالىق جۇيەلەرى زاقىمدانعانىن ايعاقتايتىن سۋرەتتەر جاريالاندى
استانا. KAZINFORM — اقتاۋ ماڭىنداعى ۇشاق اپاتى بويىنشا الدىن الا تەرگەۋ ەسەبىندە ۇشاقتىڭ جەرگە قۇلاعانشا 1، 2 جانە 3 گيدراۆليكالىق جۇيەلەرى زاقىمدانعانىن ايعاقتايتىن فوتوسۋرەتتەر مەن گرافيكتەر كورسەتىلگەن.

بۇل تۋرالى Kazinform اگەنتتىگى ق ر كولىك مينيسترلىگىنە سىلتەمە جاساپ حابارلايدى.
قۇجاتتا اتاپ وتىلگەندەي، ولار اۋە كەمەسىنىڭ كومپونەنتتەرىنە ەنگەن سىرتقى نىسانداردان تۋىنداۋى مۇمكىن.
بۇل زاقىمدانۋدىڭ سالدارىنان گيدراۆليكالىق سۇيىقتىق/قىسىم جوعالادى.

ايتا كەتەيىك، ق ر كولىك مينيسترلىگى اقتاۋ ماڭىنداعى ۇشاق اپاتىنىڭ الدىن الا ەسەبىن جاريالادى.
بۇعان دەيىن ۇشاق اپاتىنىڭ مينۋتتار بويىنشا حرونولوگياسىن جاريالاعان ەدىك.
ايتا كەتەيىك، 25-جەلتوقساندا اقتاۋ ماڭىندا باكۋدەن گروزنىيعا باعىت العان AZAL جولاۋشىلار ۇشاعى اپاتقا ۇشىراعان بولاتىن.
بورتتا 67 ادام، ونىڭ ىشىندە بەس ەكيپاج مۇشەسى بولعان. اپات سالدارىنان 38 جولاۋشى قازا تاۋىپ، 29 ادام امان قالعان ەدى.
ۇشاق اپاتىنا بايلانىستى رەسەيدە، قازاقستاندا جانە ازەربايجاندا قىلمىستىق ءىس قوزعالعان ەدى.
بۇعان دەيىن برازيليا اسكەري-اۋە كۇشتەرىنىڭ اۋە اپاتتارىن زەرتتەۋ ورتالىعىنىڭ (Cenipa) ماماندارى AZAL اۋە كومپانياسىنىڭ اپاتقا ۇشىراعان Embraer 190 ۇشاعىنىڭ قارا جاشىگىن تالداۋعا كىرىسكەنىن حابارلاعان بولاتىن.
قازاقستان رەسپۋبليكاسى كولىك ۆيتسە-ءمينيسترى تالعات لاستايەۆ اۋە اپاتىن تەرگەۋدىڭ الدىن الا قورىتىندىسى قاشان بەلگىلى بولاتىنىن ايتتى.
30-جەلتوقساندا حالىقارالىق اۋە كولىگى قاۋىمداستىعى (IATA) وقيعانى جان-جاقتى جانە بەيتاراپ تەرگەۋگە شاقىردى.
جاقىندا كولىك مينيسترلىگى اقتاۋ ماڭىنداعى ۇشاق اپاتىنا قاتىستى مالىمدەمە جاساعان ەدى.