گازاداعى قۇرباندار سانى 45805 كە جەتتى

استانا. قازاقپارات - 2023 -جىلدىڭ 7-قازانىنان بەرى يزرايلدىڭ گازا سەكتورىنداعى شابۋىلدارىنان قازا تاپقاندار سانى 45805 كە جەتتى. بۇل تۋرالى پالەستينانىڭ گازا سەكتورىنداعى دەنساۋلىق ساقتاۋ مينيسترلىگى حابارلادى، دەپ جازادى انادولى.

- قاقتىعىس 457 كۇننەن بەرى جالعاسۋدا. تەك كەيىنگى 24 ساعاتتا يزرايل ارمياسىنىڭ گازا سەكتورىنىڭ ءارتۇرلى ايماقتارىندا جاساعان «بەس قىرعىن» ناتيجەسىندە 88 ادام قازا تاپتى. سونىمەن قاتار پالەستينا ەكسكلاۆىنىڭ 208 تۇرعىنى زارداپ شەكتى، - دەلىنگەن حابارلامادا.

2023 -جىلدىڭ 7-قازانىنان بەرى 109064 پالەستينالىق جاراقات العان.

قازا تاپقانداردىڭ مايىتتەرى ءالى قيراعان عيماراتتاردىڭ استىندا جانە جول جيەكتەرىندە جاتىر.

- جەدەل جاردەم جانە ازاماتتىق قورعانىس توپتارى يزرايل اسكەريلەرى تۋدىرعان كەدەرگىلەرگە بايلانىستى ولارعا جەتە الماي وتىر، - دەپ قوستى ۆەدومستۆو.

ايتا كەتەيىك، بۇعان دەيىن يزرايل قورعانىس ارمياسى گازا سەكتورىنا 100 دەن استام شابۋىل جاساعانىن جازعان ەدىك.

حاماس گازا سەكتورىنداعى اتىستى تەز ارادا توقتاتۋ كەلىسىمىنە قول جەتكىزگىسى كەلەدى.

اۆتور

جاراسقان نۇرىبايەۆ