گازاداعى اتىستى توقتاتۋ كەلىسىمىنىڭ ەكىنشى كەزەڭى باستالدى - حاماس

استانا. KAZINFORM - ۇيىم وكىلىنىڭ ايتۋىنشا، سەيسەنبى كۇنى حالىقارالىق دەلدالدار ارقىلى كەلەسى كەزەڭ بويىنشا «بايلانىس پەن كەلىسسوزدەر» باستالىپ كەتتى.

Начались переговоры по второму этапу соглашения о прекращении огня в секторе Газа — ХАМАС
فوتو: x.com / @GPOIsrael

حاماس-تىڭ مالىمدەۋىنشە، گازا سەكتورىندا كەپىلگە الىنعانداردى بوساتۋ جانە اتىستى توقتاتۋ كەلىسىمىنىڭ ەكىنشى كەزەڭى بويىنشا كەلىسسوزدەر باستالعان.

- كەلىسسوزدەردىڭ ەكىنشى كەزەڭى باستالدى - دەلىنگەن پالەستينالىق توپتىڭ مالىمدەمەسىندە.

سونداي-اق وندا ءيزرايلدىڭ گۋمانيتارلىق كومەك كەلىسىمىن ورىنداۋدان «جالتارىپ، كەشىكتىرىپ» وتىرعانى ايتىلدى.

يزرايل الداعى كۇندەرى كەلىسسوزدەر جۇرگىزۋ ءۇشىن قاتار استاناسى دوحاعا توپ جىبەرەتىنىن مالىمدەدى. اتىستى توقتاتۋ تۋرالى العاشقى كەلىسىمگە سايكەس ەكىنشى كەزەڭ بويىنشا كەلىسسوزدەر ءبىتىمنىڭ 16- كۇنى باستالۋى ءتيىس ەدى.

ەكىنشى كەزەڭ سوعىستى اياقتاۋعا جانە امان قالعان كەپىلگە الىنعانداردى بوساتۋعا ارنالعان.

ەكىنشى كەزەڭ بىرىنشىگە قاراعاندا كەلىسۋ قيىنىراق بولادى دەپ كۇتىلىپ وتىر. حاماس بۇعان دەيىن يزرايل گازا سەكتورىنان بارلىق اسكەرىن شىعارمايىنشا، سوڭعى كەپىلگە الىنعانداردى بوساتپايتىنىن، سونداي-اق حاماس-تىڭ اسكەري جانە ساياسي مۇمكىندىكتەرىن جويمايىنشا مۇنداي قادامعا بارمايتىنىن مالىمدەدى.

نەتانياحۋ- ترامپ كەزدەسۋىندەگى كەلىسىمنىڭ بولاشاعى جانە گازا تاعدىرى

بۇگىن اق ۇيدە وتەتىن كەزدەسۋدە اقش پرەزيدەنتى دونالد ترامپ پەن يزرايل پرەمەر-ءمينيسترى بينيامين نەتانياحۋ كەلىسىمنىڭ ەكىنشى كەزەڭىنە ءوتۋ ماسەلەسىن تالقىلايدى.

- سوپاقشا كەڭسەدەگى كەزدەسۋ بارىسىندا تاراپتار گازا سەكتورى مەن ليۆانداعى اتىستى توقتاتۋ تۋرالى قولدانىستاعى كەلىسىمدەردى ساقتاۋ ماسەلەلەرىن، سونداي-اق گازادا قالعان كەپىلگە الىنعان بارلىق 79 ادامدى بوساتۋ جونىندەگى ورتاق مىندەتتەمەنى تالقىلايدى، - دەدى ترامپ اكىمشىلىگىنىڭ جوعارى لاۋازىمدى وكىلى بريفينگتە.

دۇيسەنبى كۇنى يزرايل پرەمەر-ءمينيسترى حاماس- پەن كەپىلگە الىنعاندار تۋرالى كەلىسىمنىڭ كەلەسى كەزەڭىن تالقىلاۋ ءۇشىن ۆاشينگتونعا ۇشىپ، وندا ا ق ش-تىڭ ارنايى ەلشىسى ستيۆەن ۋيتكوفپەن جانە ۇلتتىق قاۋىپسىزدىك جونىندەگى كەڭەسشى مايكل ۋولتسپەن كەزدەستى.

The Times of Israel-دىڭ يزرايلدىك جوعارى لاۋازىمدى شەنەۋنىككە سىلتەمە جاساپ حابارلاۋىنشا، نەتانياحۋ ترامپتان ەگەر حاماس اتىستى توقتاتۋ كەلىسىم شارتتارىن بۇزسا نەمەسە ەكىنشى كەزەڭ شارتتارىنا قاتىستى كەلىسسوزدەردى ادال نيەتپەن جۇرگىزە الماسا، اقش يزرايلدىڭ سوعىستى قايتا باستاۋىن قولدايتىنى تۋرالى جاريا راستاۋىن سۇرايدى.

ءوز كەزەگىندە ترامپ اكىمشىلىگى حاماس-تى گازا سەكتورىنداعى بيلىكتەن كەتىرۋدى كوزدەپ وتىر.

سەيسەنبى كۇنى ا ق ش-تىڭ ۇلتتىق قاۋىپسىزدىك جونىندەگى كەڭەسشىسى مايكل ۋولتس پەن مەملەكەتتىك حاتشى ماركو رۋبيو حاماس- تىڭ گازا سەكتورىن باسقارا المايتىنىن اشىق مالىمدەدى.

تۇركياعا، الجيرگە جانە قاتارعا دەپورتاتسيالاۋ

سەيسەنبى كۇنى حاماس- تىڭ باسپا ءسوز حاتشىسى سونداي-اق يزرايل اتىستى توقتاتۋ كەلىسىمى اياسىندا بوساتقان 15 پالەستينالىق تۇتقىننىڭ باستاپقىدا مىسىرعا دەپورتاتسيالانعاننان كەيىن تۇركياعا كەلگەنىن مالىمدەدى. حاماس حابارلاعانداي، كەيبىر تۇتقىندار سونىمەن قاتار الجيرگە نەمەسە كاتارعا دا بارۋى مۇمكىن.

كەلىسىم شارتتارىنا سايكەس، يزرايلدىكتەردى ولتىرگەنى ءۇشىن سوتتالعان پالەستينالىقتار بوساتىلعان جاعدايدا يوردان وزەنىنىڭ باتىس جاعالاۋى، گازا سەكتورى جانە شىعىس يەرۋساليمنەن تىس جەرگە ءبىرجولا دەپورتاتسيالاناتىن بولادى.

اتىستى توقتاتۋدىڭ ءبىرىنشى كەزەڭىندە حاماس 13 كەپىلگە الىنعان ادام مەن تاعى بەس تايلاند ازاماتىن كەلىسىمنەن تىس بوساتقان. بۇعان جاۋاپ رەتىندە يزرايل 583 پالەستينالىق تۇتقىندى بوساتىپ، ونىڭ 79 ى مىسىرعا جىبەرىلدى.

30 قاڭتاردا گازا سەكتورىندا بارىمتاداعى سەگىز ادام - ءۇش يزرايل ازاماتى جانە بەس تايلاند ازاماتى بوساتىلدى.

اۆتور

زارينا تۋعانبايەۆا

سوڭعى جاڭالىقتار