گازادا قازا تاپقان پالەستينالىقتاردىڭ سانى 30 مىڭنان استى
استانا. KAZINFORM - يزرايل گازا سەكتورىنىڭ وڭتۇستىگىنە كىرۋدى جالعاستىرىپ، حاماس باسشىلارى گۋمانيتارلىق نىسانداردىڭ استىنداعى تۋننەلدە جاسىرىنىپ جاتقانىن مالىمدەدى. د د س ۇ مالىمەتىنشە، انكلاۆتا قايتىس بولعان پالەستينالىقتاردىڭ سانى 30 مىڭنان استى، دەپ جازادى Euronews.
گازا سەكتورىندا قازا تاپقان پالەستينالىقتاردىڭ سانى 30 مىڭنان استى، تاعى 70 مىڭنان استام ادام جاراقات الدى.
بۇل تۋرالى دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى تەدروس ادانوم گەبرەيەسۋس X الەۋمەتتىك جەلىسىندە حابارلادى.
«بۇل جانتۇرشىگەرلىك زورلىق-زومبىلىق جانە قايعى-قاسىرەت توقتاۋى كەرەك»، - دەدى گەبرەيەسۋس ءوز سوزىندە.
د د س ۇ كەلتىرگەن مالىمەت بۇۇ قۇرىلىمدارى سەنىمدى دەپ سانايتىن گازا دەنساۋلىق ساقتاۋ مينيسترلىگىنىڭ ەسەپتەۋىنە نەگىزدەلگەن.
يزرايل گازا سەكتورىنىڭ وڭتۇستىگىندە شابۋىلىن جالعاستىرىپ جاتىر.
ال حالىقارالىق دەلدالدار كەپىلگە الىنعان ادامداردى بوساتۋ ءۇشىن اتىستى توقتاتۋعا بار كۇش-جىگەرىن سالۋدا.
اۋە شابۋىلى كەزىندە بۇۇ گۋمانيتارلىق اگەنتتىگى باپور انكلاۆقا از مولشەردە ازىق-تۇلىك جەتكىزۋدە قيىندىقتارعا تاپ بولعانىن جانە پالەستينالىقتاردىڭ اشتىققا ۇشىراۋ ءقاۋپى جوعارى ەكەنىن ايتادى.
گۋمانيتارلىق جۇك تيەلگەن كولىكتەر ايماققا كىرە الماي جولدا تۇر.
اق ءۇي اتىس توقتاي سالىسىمەن كومەك كورسەتىلەتىنىن مالىمدەدى.
يزرايل كوزدەگەنى - اۋرۋحانالار مەن باسقا دا گۋمانيتارلىق نىسانداردىڭ استىنداعى تۋننەلدە جاسىرىنعان حاماس سودىرلارى ەكەنىن ايتادى.
سوڭعى مالىمەت بويىنشا، توپ جەتەكشىسى كەپىلگە الىنعانداردى ءتىرى قالقان رەتىندە پايدالانىپ، جەراستى بۋنكەرلەرىنىڭ بىرىندە جاسىرىنىپ ءجۇر.
اتىستى توقتاتۋ تۋرالى كەلىسىم پالەستينالىق تۇتقىنداردىڭ ورنىنا كەپىلگە الىنعان ادامداردى بوساتۋدى كوزدەيدى.
