گازا سەكتورىندا قازاقستاندىق 25 وتباسى بار
گازا سەكتورىندا قازاقستاندىق 25 وتباسى بار. بۇل تۋرالى سىرتقى ىستەر مينيسترلىگىنىڭ رەسمي وكىلى ايبەك سمادياروۆ ايتتى، دەپ حابارلايدى Kazinform اگەنتتىگى.
«قولدا بار اقپاراتقا سايكەس، گازا سەكتورىندا قازاقستان ازاماتتارىنان تۇراتىن 25 وتباسى بار دەگەن اقپارات كەلىپ ءتۇستى. كوبى - سول جاققا تۇرمىسقا شىققان ازاماتشالارىمىز. كەلىپ تۇسكەن حابارلامالارعا سۇيەنسەك، قازىرگى ۋاقىتتا يزرايلدىڭ جەردەگى وپەراتسيالارىنا، سونىمەن قاتار جۇرگىزىپ جاتقان بومبالاۋىنا بايلانىستى وتباسىلاردىڭ كەيبىرى گازا سەكتورىنان قاۋىپسىز ورىن ىزدەپ جاتىر. ول جەردە بايلانىس وتە ناشار. سوندىقتان ءالى كۇنگە دەيىن جان-جاقتى اقپارات جيناي الماي وتىرمىز. ءبىر-ەكەۋىمەن بايلانىستىق. ءبىراق، ارى-بەرى قاۋىپسىز جەر ىزدەپ جۇرگەندىكتەن اقپارات بەرۋگە مۇرشالارى جوق. بۇل باعىتتا ءالى جۇمىس ىستەپ جاتىرمىز»، - دەدى ايبەك سمادياروۆ مينيسترلىكتەگى بريفينگ بارىسىندا ب ا ق وكىلدەرىنىڭ ساۋالىنا وراي.
