قىتاي سىرتقى ىستەر ءمينيسترى يزرايلدى «شەكتەن شىقتى» دەپ سىنادى
قىتاي سىرتقى ىستەر ءمينيسترى تۇركيا، ساۋد ارابياسى جانە يرانداعى ارىپتەستەرىمەن تەلەفون ارقىلى سويلەسىپ، يزرايلدى «شەكتەن شىقتى» دەپ سىنادى، دەپ حابارلايدى kazinform.
قىتاي سىرتقى ىستەر مينيسترلىگىنىڭ رەسمي سايتىندا جازىلعانداي، قىتاي سىرتقى ساياسات ۆەدومستۆوسىنىڭ باسشىسى ۆان ي 15- قازاندا ساۋد ارابياسى، يران جانە تۇركيا سىرتقى ىستەر مينيسترلەرىمەن تەلەفون ارقىلى سويلەستى.
ۆان ي اڭگىمەلەسۋ بارىسىندا يزرايلدىڭ گازا سەكتورىنا قارسى قازىرگى اسكەري وپەراتسيالارى ءوزىن-ءوزى قورعاۋ شەگىنەن اسىپ كەتكەنىن ايتتى.
ونىڭ اتاپ وتۋىنشە، كەز كەلگەن ەل ءوزىن-ءوزى قورعاۋ قۇقىعىن پايدالانعان كەزدە جازىقسىز بەيبىت تۇرعىنداردىڭ قۇربان بولۋى ەسەبىنەن ەمەس، حالىقارالىق گۋمانيتارلىق قۇقىقتى ساقتاۋى كەرەك.
قىتاي ءمينيسترى سونداي-اق، پالەستينا حالقىنا قارسى ادىلەتسىزدىكتىڭ جارتى عاسىردان بەرى جالعاسىپ كەلە جاتقانىن، سوندىقتان قىتاي ساۋد ارابياسى جانە باسقا ەلدەرمەن بىرگە پالەستينانىڭ ۇلتتىق قۇقىقتارىن قالپىنا كەلتىرۋدەگى ءادىل ىسىنە قولداۋ كورسەتۋگە دايىن ەكەنىن، قىتاي پالەستينا ماسەلەسىندە يسلام ەلدەرىنىڭ «ءبىرىڭعاي داۋىس شىعارۋىن» قولدايتىنىن دا باسا ايتتى.
ايتا كەتەيىك، بۇل قىتاي سىرتقى ىستەر ءمينيسترىنىڭ حاماس 7- قازاندا شابۋىلىن باستاعاننان كەيىن يزرايلدىڭ قارسى سوققىسىن العاش رەت سىنعا العانى. ءبىراق، وسى ۋاقىتقا دەيىن ول شابۋىلدى باستاعان حاماستى ءالى اشىق ايىپتاعان ەمەس. س ءى م مالىمەتىنشە، حاماستىڭ يزرايلگە قارسى بۇعان دەيىن جاساعان شابۋىلدارىندا قىتايدىڭ 4 ازاماتى قازا تاۋىپ، التاۋى جارالانعان، ەكەۋى ءىز-ءتۇزسىز جوعالعان.
قىتايلىق ب ا ق- تىڭ حابارلاۋىنشا، قىتاي ۇكىمەتىنىڭ تاياۋ شىعىستاعى ارنايى وكىلى چجاي تسزيۋن بەيبىتشىلىكتى ىلگەرىلەتۋدى ۇيلەستىرۋ ءۇشىن وسى اپتادا تاياۋ شىعىس ەلدەرىنە بارۋدى جوسپارلاپ وتىر.
